Meteorologisk institutt har sendt ut Obs-varsel då det er venta vanskelege køyreforhold i fjellet grunna snøbyer og vind.
– Det er mykje vind i fjella no, der er det vestleg sterk kuling, men det ser ut som at det skal minke litt i kveld og gå over i nordvest liten kuling, forklarer meteorolog Anne Mette Olsen.
I tillegg ser det ut som at snøgrensa vil gå ned
– Snøgrensa kan gå ned til heile 200–300 moh. i dag, så det må ein vere obs på, seier Olsen.
- SJEKK TRAFIKKEN HER:
STENGT: Søndag er riksveg 7 over Hardangervidda stengt. Biletet er frå Dyranut, klokka 09:00.
Foto: Statens vegvesenStengt
– Det ser ikkje ut som at været vil endre seg med det fyrste og mange fjellovergangar er mellombels stengt. Eg oppmodar nesten folk til å heller køyre langs kystlinja, sjølv om det er mykje lenger, seier trafikkoperatør Camilla Einersen i Statens vegvesen.
Desse fjellovergangane er mellombels stengt:
- Riksveg 7 Hardangervidda: Rv7 Hardangervidda er mellombels stengt for alle køyretøy.
- Riksveg 13 Vikafjellet – Stengt på grunn av uvêr.
- Fylkesveg 50 Hol-Aurland – Stengt på grunn av uvêr.
- Fylkesveg 53 Tyin-Årdal – Stengt på grunn av uvêr.
STENGT: Vikafjellet er stengt for all trafikk søndag. Biletet er tatt ved Hestavollen.
Foto: Statens vegvesenKolonnekøyring
– Om ein vel å stå i kolonne, så må ein førebu seg på lange ventetider på ein dag som dette, seier Einersen.
Desse vegstrekningane er det kolonnekøyring:
- Europaveg 134 Austmannlitunnelen-Våslidtunnelen, på strekninga Haukelifjell: Kolonnekøyring på grunn av uvêr. Kan bli stengt på kort varsel.
- Riksveg 15: Strynefjellet: Kolonnekøyring på grunn av uvêr. Her er det ventetid på ca 2,5 timer.
- Europaveg 16 Filefjell: Snødekke, redusert sikt.
For oppdaterte vegtrafikkmeldingar, sjekk Statens vegvesen sine nettsider. Yr.no har oppdatert værvarsel for alle fjellovergangane.