Få Baroniet heim til Vestlandet!
Det krev Hordaland Høgre, som får støtte av lokalpartiet i Kvinnherad.
Styrt frå Oslo
I dag er det Universitetet i Oslo som eig Baroniet i Rosendal, men det må endrast, meiner fylkesordførarkandidat for Høgre, Tom-Christer Nilsen.
- Det høyrest for meg heilt galt ut at det sit nokon i Oslo og skal styre ein eigedom i ein dal på Vestlandet, seier han.
I dag har kommunen og fylkeskommunen ein styrerepresentant kvar. Dei seks øvrige er det Universitetet i Oslo som vel. Det er ikkje nok, meiner Nilsen.
Fåmælt i Oslo
Rektor ved Universitetet i Oslo, Geir Ellingsrud vil ikkje kommentere problemstillinga utover at han meiner det ikkje er ei aktuell problemstilling. Og universitetet i Bergen sin kommentar er: "vi har eit godt samarbeid med universitetet i Oslo."
Ein som er meir enn villig til å kommentere saka er ordførarkandidat for Høgre i Kvinnherad, Arne Havnerås.
- Dette vil nok skape litt debatt, men det må vi tole, seier han.
Baroniet vart i si tid testamentert til Universitetet i København, og deretter overteke av Universitetet i Oslo. Og Tom-Christer Nilsen meiner det er heilt realistisk å få det gamle slottet over på bergenske hender.
- Eg trur dette blir gjennomført viss fagmyndigheitene kan kome til ei semje, seier han.