Hoppet blei gjennomført tidlegare denne månaden, då Cees Rimstad Spil var på fisketur med nokre kameratar i nærleiken av Storseisundbrua ved Atlanterhavsvegen.
– Det var morosamt heilt til eg trefte vassflata, men etterpå måtte eg lida, seier 22-åringen til .
– I vennegjengen har me i fleire år snakka om å hoppa frå ei høg bru, men ingen av oss hadde fått gjort det. Medan me fiska sa eg på spøk at eg skulle hoppa frå Storseisundbrua, fortel Cees Rimstad Spil til NRK.
Dei kom seg inn til land og til toppen av brua.
– No er eg no her, tenkte eg då. Så tok eg av meg t-skjorta og hoppa medan kompisen min filma, seier Rimstad Spil.
Denne filmen blei etterpå lagt ut på nettsida LiveLeak.
(Saka held fram under videoen)
Det var lokalavisa for Kristiansund, , som først fortalde om det vågale hoppet.
Lovleg, men politiet åtvarar
Men hoppet blei ikkje heilt som han hadde førestilt seg.
– Det small veldig då eg trefte vatnet, meir enn eg hadde trudd. Eg skadde meg ikkje, men eg trur eg forstua halebeinet, så eg gjekk med smerter i to veker, seier 22-åringen.
Det er lovleg å hoppa frå Storseisundbrua, men politiet liker dårleg at folk hoppar frå brua.
– Me frårådar folk på det sterkaste å gjera noko slikt. Det er tross alt veldig høgt og er ein uheldig og landar skeivt kan ein bli livstrugande skadd eller dø, seier etterforskingsleiar Kristian Gundersen ved Kristiansund politistasjon til .
– Ville ikkje gjort det igjen
Cees Rimstad Spil er oppvaksen i Bergen, men har budd i Molde dei siste åra. Han er ein habil symjar og har drive med symjing og stuping sidan han var liten. Likevel angrar han på hoppet.
– Eg var nesten heilt rett i kroppen då eg hoppa, berre litt skeiv, og det førte til to veker der eg ikkje greidde å sitta, forklarer 22-åringen.
– Eit slikt hopp kan vera ekstremt farleg og eg vil ikkje anbefala det. Eg ville heller ikkje ha gjort det om igjen sjølv, seier Cees Rimstad Spil.