Aarebrot er Noregs mest kjende forelesar, og kanskje den professoren på Universitetet i Bergen som har størst oppmøte på forelesingane sine.
I dag fyller den populære akademikaren 70 år, og nyttar dagen til å presentera eit heilt nytt NRK-sendt prosjekt: 500 år på 500 minutt.
– Ein gleder seg ikkje til ein fødselsdag i min alder. Det er for så vidt ein vanleg dag, men det er forferdeleg mykje bryderi med å byte kontor og sende brev til myndigheitene om pensjonar og skit og lort, seier Aarebrot.
– Skal du gå av med pensjon?
– Det blir eg jo pent nøydd til, men eg håpar å kunne fungere på universitetet på ein eller annan måte.
– Det eg er mest nøgd med gjennom desse 70 åra er nok at eg har fått vere med å bygge opp eit levande statsvitskapleg miljø i Bergen, seier han.
Skal fylle Grieghallen
Jubilanten feirar med å lansere det neste store prosjektet: 500 år på 500 minutt, som handlar om reformasjonsjubileet. Forelesninga skal sendast direkte frå Grieghallen 27. oktober.
– Eg startar i 1517, då Luther sette opp sine tesar på kyrkjedørene i Wittenberg, ifølge myten. Eg tek for meg politikk, korleis demokratiet har utvikla seg og kva betydning religion har hatt for samfunnsutviklinga i løpet av 500 år, seier Aarebrot.
Tidlegare har han mellom anna gått gjennom 200 år norsk historie på like mange minutt.
Thomas Hellum, som er prosjektleiar og fotograf i NRK, har laga akademisk sakte-TV med Aarebrot fleire gonger.
– Denne gongen satsar vi på at Frank fyller Grieghallen. Det blir det ultimate foredraget, seier Hellum.
– Freden står i fare
Aarebrot har allereie planane klare for endå eit prosjekt.
– I 2018 har eg lyst å gjere noko kring freden etter 1. verdskrig, og kva betydning den har hatt for det som har skjedd seinare. Det handlar om den moderne verda som Trump og kompani har så mykje imot.
70-åringen legg ikkje skjul på at han er uroa for framtida.
– Akkurat no er eg veldig frustrert. Eg opplever at det som alle var einige om, at vi ikkje ville ha 2. verdskrig på ny, igjen kan skje. Lukka grenser og haldningar om at «vårt folk er betre enn alle andre» er farleg. Då er det ikkje lenger grunnlag for fred, seier Aarebrot.
– Viss du kunne fått kva som helst i bursdagsgåve, kva ville du ønska deg då?
– Eg skulle ynskje at vanlege folk tok til vettet. Som ein bergensk historikar sa ein gong: «I det augneblinken du er meir oppteken av å forakte dei svake enn å kritisere dei mektige, er du i ferd med å undergrave deg sjølv».
Sjå fleire Aarebrot-prosjekt frå NRK: