– Kjære alle saman, i dag har me verkeleg skapt politisk historie, sa førstekandidat i Bergen Sondre Båtstrand på valvaka til Miljøpartiet Det Grøne i natt.
15 år med jobbing for dei grøne verdiane. Seint tysdag kveld kunne partileiaren konstatera at MDG har fått sitt gjennombrot. Ikkje berre i Bergen men i resten av Hordaland.
– Det er klart dette er eit gjennombrot. MDG har i Hordaland stilt seks kommunelister tidlegare, no brakar me inn i kommunestyra i heile Hordaland, og over heile landet, seier partiets toppkandidat i fylket Tom Sverre Tomren.
21 mandat
Dei Grøne kan jubla over innsteg i ei rekke kommunar i Hordaland. I kommunar som Kvam og Osterøy får partiet høvesvis fem og nesten sju prosent. Totalt ligg dei an til 21 mandat i kommunestyra i Hordaland. I Fylkestinget får dei tre plassar, to fleire enn ved sist val.
Partiet ser ut til å få representantar i 14 kommunar i Hordaland. Her er talet på mandat i dei ulike kommunane:
- Meland: 2
- Bergen: 4
- Lindås: 1
- Os: 2
- Voss: 2
- Osterøy: 2
- Fjell: 1
- Askøy: 1
- Vaksdal: 1
- Kvam: 1
- Samnanger: 1
- Stord: 1
- Kvinnherad: 1
- Sveio: 1
– Mykje letting
I dag startar kampen om posisjonar. For MDG byrjar ei ny verkelegheit.
– Plutseleg sitt me i kommunestyra rundt om i landet. Fleire av dei 22 kommunelistene som me stiller her i fylket skal no inn i kommunestyra, sa Båtstrand.
– Det er mykje letting og glede, folk har stått på som heltar dei siste vekene, sa Båtstrand til NRK etter at førehandsstemmene var talt opp.
– I mange kommunar i Noreg har Dei Grøne no kome inn i politikken. Dette er utruleg kjekt og eit nasjonalt gjennombrot.
For Båtstrand er det ein ting som tel når kabalen om byrådsmakt no skal leggast.
– Me vil samarbeida med dei som gjer mest utteljing på miljøpolitikken. Det har me vore klar på heile vegen.