– Det har vore vanskeleg å få folk til å forstå kor viktig det er å kontrollera slangane og regulatorane på gassanlegga, seier Erik Brauner prosjektleiar i Norboat, ein interesseorganisasjon for fritidsbåtbransjen.
Utspelet kjem etter fleire tilfelle av gassforgifting på norske båtar i sommar.
I Bergen ligg tre personar kritisk skadd på sjukehus etter at dei vart funnen i ein båt ved Bryggen i Bergen sundag. Politiet mistenker at personane er kullosforgifta. Politiet etterforskar i dag hendinga, og det er så langt ikkje klart kva som førte til at dei tre vart forgifta.
– Gløymer å kontrollera
Gass for å fyra opp til dømes kokeplater er vanleg i fritidsbåtar. Bransjen meiner folk ikkje er flinke nok til å testa utstyret dei bruker.
– Problemet er stort også i campingvogner og hytter, der folk pustar inn gassen når dei søv.
Brauner fortel at gassanlegget og slangane bør sjekka trykket ein gong i året.
– Ein må kontrollera at anlegget er 100 prosent tett. Det er om å gjera å sørga for å kontrollera og trykkprøva anlegget, slik at ein veit at ein har eit tett anlegg før båtsesongen startar.
– Konsekvensane av at ein ikkje trykktestar er at ein ikkje veit om ein har lekkasje eller sprekk i slangen.
Finst regelverk
– Det er ein tragedie at slike ulukker skjer. Ein ser utfallet no seinast i Bergen på sundag. Regelverket er heilt klart, men det vert ikkje overheldt.
Det er ting som skal vera på plass, fortel han.
– Slangen har ei levetid på fem år. Dei skal vera merka med dato og bør skiftast kvart femte år.
– Ein skal alltid ha ei kran like ved kokeapparatet ein kan skru att. Det kan vera langt frå gassbehaldaren til kokeapparatet i store båtar.
Gassalarmar kan monterast
– Det finst også gassalarmar ein kan få kjøpt. I augneblinken er den ikkje påbode i EU, men me trur det vil komma etter kvart.
Med ei gassflaske på fem kilo om bord er det enorm kraft når det først smell, fortel Brauner.
– Eit anna problem er at det syndast mykje med lagring av ekstraflasker. Den må lagrast i eigen boks.
Han kjem med ei klar oppfordring til publikum:
– Sjekk anlegget ditt!