– Fleire spør om hjelp via Facebook

– Eg hadde lova dottera mi å pussa opp soverommet hennar til jul, men tid og krefter strakk ikkje til, fortel Elisabeth Tonning.

For nokre veker sidan skreiv ho difor eit innlegg på Facebook, der ho bad om hjelp.

– Kvardagen blei for mykje. Det var legebesøk, skule, lekser, middag, handling, alt. Eg hadde ikkje overskot, seier Tonning.

Responsen lot ikkje vente på seg. Etter berre nokre timar hadde 35 personar meldt seg til dugnad på Facebook.

– Det var overveldande og rørande, seier Tonning.

– Modig

Ei av dei som melde seg var Linn Iren Wisnes.

– Eg synest det er tøft å sei frå. Facebook-innlegget trefte meg, og eg fekk lyst til å hjelpe, seier Wisnes medan ho sparklar soveromsveggen til Tonning si dotter.

Tonning seier det var naturleg for ho å spørje om hjelp på Facebook.

– Kvar elles skulle eg gjere det? Eg visste ikkje om nokon andre plassar å spørje om hjelp. Eg synest ikkje eg kunne hengje opp plakat i nabolaget akkurat, seier ho.

Dugnadstrend på sosiale medium

Ifølge ekspert på sosiale medium, Tarjei Alvær Heggernes, er det stadig meir vanleg å be om hjelp nettopp på Facebook. Han trur det er lettare å spørje tilfeldige folk om hjelp, enn sine nærmaste.

– Ein vil gjerne ikkje vere til bry for dei ein kjenner, som ein veit har sine eigne ting dei må ta seg av, seier Heggernes som er lektor i strategisk bruk av IT ved Høgskulen i Bergen.

• Les òg: Facebook slår alle rekorder i tredje kvartal

– Distansen som er mellom deg og dei digitale venene dine er litt større, og det gjer det nok lettare å spørje etter hjelp digitalt, seier han.

Vil hjelpe tilbake

– På den måten kan dei som har tid og overskot hjelpe, i staden for at eg må mase på til dømes mor mi i som bur langt vekke for å få ho til å vere barnevakt medan eg heldt på med oppussing, seier Elisabeth Tonning.

Ho er takksam, og vil gjerne hjelpe nokon tilbake.

– Eg vil gjerne gi litt igjen, dersom det skullle vere nokon andre som treng litt hjelp ved ei seinare anledning, seier Tonning.