– Vi har hatt stigning i vassverdiane gjennom gårsdagen og vidare gjennom natta. Vi hadde ein topp i natt, og i Opo målte vi toppnivået på 236 kubikk kvart sekund. Det er eit høgt tal. Elva Vosso har stige 30 centimeter det siste døgnet, seier regionsjef i Norges vassdrag og energidirektorat (NVE), Brigt Samdal.
Han forventar store vassmengder det neste døgnet. Det er meldt høge temperaturar, som gjer at snøen i fjellet smeltar i rekordfart.
– Det er klart at med det vêret vi skal ha så vil snøsmeltinga fortsette. Då er vi litt prisgitt korleis dette blir med kombinasjonen med nedbør og snøsmelting blir, seier Samdal.
I går vart flaumvarselet for Hordaland oppgradert frå gult til oransje nivå, det er det neste høgaste av dei fire nivåane på NVE sin skala. Det gjeld også Møre og Romsdal, Sogn og Fjordane, Rogaland, Aust-Agder, Telemark, Buskerud og Oppland.
- LES OGSÅ:
- LES OGSÅ:
Følgjer godt med
Samdal meiner at kommunane og lokalt nivå er budd på flaumvarselet, og følgjer godt med på det som skjer.
– Vi håpar og trur at vi har kontroll så langt. Eg har ikkje fått melding om store skader endå, men det er store krefter i sving, og det skal små endringar til for at det kan skje uheldige omstende.
Må vere forsiktig
Det er høg vasstand og vatnet har stor fart fleire stadar i Hordaland. Samdal seier at folk må vere merksemd på dette.
– Ein må passe på at ein ikkje kjem for nær elvene, og passe på å halde vegane opne så vatnet får renne der det skal, seier Samdal.
Med så høge temperaturar som er venta i løpet av laurdag og søndag med rundt 28 grader vil NVE følgje situasjonen nøye.