Vestlandet har opplevd sin verste snøskredvinter på fleire år. Tal frå NVE syner at talet på dagar med snøskredfare på Vestlandet denne vinteren er mangedobla, samanlikna med året før.
Framleis er fleire viktige samferdsleårer stengde på grunn av skred og snøskredfare. Mellom anna E39, hovudvegen mellom Bergen og Førde, som no er stengt på åttande døgnet.
– Denne vinteren har vore spesielt ille og krevjande, seier regiondirektør i NVE, Rune Engeseth.
Sjå oversikt over dei skredstengde vegane i botn av artikkelen.
LES OGSÅ:
E39 opnar heller ikkje i dag
Søndag for ei veke sidan vart fire bilar trefte av eit snøskred på E39 i Romarheimsdalen, og sidan vegen blei stengt for andre gong torsdag, har det gått ni nye skred i området.
Heller ikkje i dag vert vegen gjennom Romarheimsdalen opna. Mykje snø og mildvêr gjer at geologane vurderer det som for farleg.
Det er dei store snømengdene kombinert med låge temperaturar som har ført til den store snøskredfaren, seier geolog Njål Farestveit, som i dag undersøkte skredområdet langs E39.
– Når det er veldig mykje snø, kan skreda bli større, og dei får lengre utløpslengde. Vegane våre vert meir trua.
– Vil komme fleire skred
I går var det E39 langs Hornindalsvatnet som fekk kjenne på naturkreftene.
Eit stort snøflak losna på tusen meters høgde, og drog med seg store jordmassar.
Og me har enno ikkje sett slutten på skredvinteren, ifølgje geologen.
– Me kjem nok til å sjå ein god del skredaktivitet vidare framover. Me kan framleis få meir snø i mars, som er ein snømånad i fjellet, og i tillegg skal all snøen som no er i fjellet ned, seier Farestveit.
LES OGSÅ:
Desse vegane er stengde
Desse vegane er stengde på grunn av skred eller snøskredfare:
- E39 på strekninga Romarheim–Oppedal
- Fv 313 Nesheimfjellet
- Fv 345 Modalen–Steinsland
- Rv 13 Vikafjellet
- Fv 241 Gudvangen–Bakka
- Fv 93 Vadheim – Heggheim