Totalt var det per juli i år 21.166 personar som har flydd til og frå lufthamna på Sørstokken, sørvest på Stord. Det er 5.929 personar fleire enn på same tid i fjor, noko som gir ein flott trafikkauke på 38,9 prosent for den vesle lufthamna.
Lufthamnsjef Jan Morten Myklebust gir ein betydeleg del av æra til øya si store bedrift Kværner Stord.
– Dei har godt med arbeid. Dei nye prosjekta vert prosjektert i Oslo, så då reiser stordabuen austover for å jobbe der. Samstundes er det stor aktivitet på verftet, så då flyr austlendingane og utlendingane over til oss, forklarar Myklebust.
Avhengige av verftet
Lufthamnsjefen har ingen problem med å innrømma at når det går oppover for storbedrifta på øya, så peikar pila til vêrs også på flyplassen.
– Ja, vi er veldig avhengige av dei. Utan dei hadde det ikkje vore så greitt å drive flyplass på Stord.
– Men vi ser med glede at stadig fleire privatreisande nyttar seg av flyplassen.
Det er Danish Air Transport (DAT) som i dag flyr ruter til Molde og Oslo, samt Aalborg og Billund i Danmark via Stavanger.
Utvidar rutetilbodet
Dei fleste flyr til og frå Oslo, og ifølge lufthamnsjefen har det vore vanskeleg for dei reisande å få plass på flya. Det fører til at DAT set opp fleire ruter frå september av.