Valestrand Hjellvik frå Osterøy vil investera 250 millionar i ny stadion og fleirbrukshall, kombinert med leilegheiter og næringsormåde. Overtakinga av ei tomt på 45 dekar er snart i boks og finansieringsplanane er i rute.
– Det har alltid vore noko spesielt med klubben. Her er det entusiasme, energi og ambisjonar, seier dagleg leiar Ove Håland.
– Spelte på ein «skuleplass»
Det som høyrest ut som utvidingsplanane til ein middels norsk toppklubb, er i realiteten storsatsinga til ein klubb som har veksla mellom 5-, 4-, og 3.-divisjon sidan grunnleggingsåret 1992. Skissene er eit resultat av planar som oppstod i 1999, då klubben trong ei avlastningsbane.
– Sist me var oppover i divisjonane, følte me «skuleplassen» me spela på hindra oss. Kapasiteten me planlegg er alt for stor til det nivået me spelar på i dag, men me har større sportslege ambisjonar enn 4. divisjon. Målet er å nå 1. divisjon.
Sikra opprykk i siste serierunde
Håland er dagleg leiar i det lokale utviklarselskapet Eiendomvest AS, som gir 4. divisjonsklubben ei tomt på 45.000 kvadratmeter i gåve.
– Klubben fortener og treng ein større arena. Me vil gjera det me kan for å gi klubben eit anlegg som står i stil med det han fortener, seier styreleiar i Eiendomvest, Roald Reime Fosse.
Han meiner tomteverien vil vera nokså høg når området er planert og regulert.
– Men det blir berre spekulasjonar. Poenget er at klubben er hjarta og sjela i lokalsamfunnet her ute og me har trua på prosjektet.
- Les også:
Klubben sikra opprykket i siste serierunde. Erkerival Osterøy snubla mot allereie opprykksklare Bergen Nord, og Valestrand Hjellvik kunna jubla for opprykk med siger i siste kamp.
Dermed blei det opprykksfest og markeringsfest for anlegget som har fått namnet Valestrandsparken.
Fryktar ikkje mageplask
Det er enno uvisst når arenaen med dei 4.856 sitteplassane kan stå klar. Men vegen er enno lang. Priskalkylen lyder på 250 millionar, som skal sikrast ved eigenkapital, sal og leigeinntekter.
Men detaljane er ikkje på plass.
– Det viktigaste er at me har ei tomt klar, ein plan for finansieringa og klare skisser for eit moderne anlegg. Området er i dag skog og udyrka mark, og eg trur det planmessige arbeidet skal gå i orden.
– Ein 4. divisjonsklubb som legg 250 millionar og nesten 5.000 sitteplassar i potten. Du er ikkje redd for å ta vatn over hovudet?
– Det er mange som lurar på det. Me vil heller byggja større enn mindre for å sikra å ta inn driftsinntekter. Vert det for lite, går det utover det som kan gje inntekter i kassa.