38 menneske har mista livet i bygg og anlegg dei fire siste åra, medan ingen har omkome på norsk sokkel i oljebransjen. Forsking viser at tryggleiksrutinane er mykje betre i oljebransjen.
Anne Bogsnes frå Bergen, som miste mannen sin i ei anleggsulukke, er skaka over HMS-arbeidet innanfor bygg- og anlegg.
– Det er heilt forferdeleg, seier Bogsnes.
Det er to år sidan bergenskvinna miste mannen i ei arbeidsulukke i Ulvintunnelen ved Eidsvoll. Ingen er vorte stilt til ansvar for ulukka.
– 15. mai er det to år sidan ulykka skjedde og det er framleis ingen avklaring. Vi veit ikkje om det blir tiltale eller ikkje, seier Bogsnes.
- LES OGSÅ:
Må dokumentere tryggleik
Rutinane er mykje strengare i oljebransjen, seier Eirik Albrechtsen som forskar på sikkerheits-leiing ved NTNU.
– Ein må gjennom eit tryggleikskurs, og du får ikkje jobbe før du dokumentere at du har tryggleikskompetanse, seier Albrechtsen.
Førsteamanuensis meiner det har vore alt for mange dødsulykker i bygg og anlegg dei seinare åra. Nærare bestemt 38 omkomne dei fire siste åra.
– Sjølvsagt så er over tretti omkomne for mange, seier Albrechtsen.
Systematisk arbeid med HMS
Dette står i sterk kontrast til tala i oljebransjen, som sjefingeniør Øyvind Lauridsen i Petroleumstilsynet nyleg la fram.
– Vi hadde den siste dødsulykke i 2009, seier Lauridsen.
Fem år sidan siste omkomne på norsk sokkel, kjem som eit klart resultat av systematisk arbeid med HMS over mange år.
– Om det er alvorlege forhold, så setje i verk vi sjølv gransking og ber selskapa å granske forholda, seier Lauridsen.
Bygg og anlegg har no også innført ein null-visjon med mål om ingen omkomne. Ifølgje forskaren er det mogeleg med målretta arbeid.
– Mange av ulykkene kunne ha vore forhindra med betre planar og teikningar, seier Albrechtsen.
– Bør lære av oljebransjen
– Ingen skal døy eller bli skadd av å gå på jobb. Det er veldig trist og beklageleg at vi har så høge tal i anleggsbransjen, seier Borghild Lekve, regiondirektør i Arbeidstilsynet.
Ho trur grunnen til forskjellane er at mange aktørar i bygg- og anleggsbransjen ikkje er like ressurssterke økonomisk, og meiner andre bransjar kan lære av oljebransjen.
– Krava til arbeidsgivar har nok vore like sterk i bygg og anlegg som i olje og gass. Men oljebransjen har nok vore flinkare til å jobbe med å realisere tryggleikskrava sine, seier Lekve.