-Fengselsstraffene vil få heile bransjen til å skjerpe seg. Dette er ein historisk dom og ein veldig viktig dom for miljøet, seier Kurt Oddekalv, som er leiar i Norges Miljøvernforbund, til NTB.
Oddekalv melde saka
Det var Oddekalv og Norges Miljøvernforbund som melde Vest Tank for miljøkriminalitet. Men også Statens forurensningstilsyn burde fått straff, seier Oddekalv.
Også Bellona er tilfreds
-Vi hadde håpa på ein endå strengare dom, men vi er glade for at grov miljøkriminalitet blir straffa med fengsel, seier nestleiar Marius Holm i Bellona til NTB.
-Det bør vere slutt på den tida då grov vinningskriminalitet som set miljø og helse i fare, blir straffa med foretaksbøter som tilsvarar nokre få veker inntening. Vest Tank har spekulert i uforsvarleg avfallshandtering for å tene penger. Det er sjofelt, det er bøllete og det er kriminelt, seier Holm.
Dette er dommen:
Både tidlegere styreformann Trond Emblem og tidlegare dagleg leiar Jostein Berland er dømde til eitt år og seks månaders fengsel og mista retten i fem år til å drive verksemd, være dagleg leiar av, eller å sitte i styret i selskap som krev løyve frå Klif eller DSB. Dei er dømde for brot på straffelova, forurininglova, arbeidsmiljølova og brann- og eksplosjonsvernlova.
Rådgjevar for selskapet, Karl-Jan Erstad frå Fjaler er dømt til 45 dager fengsel på vilkår med prøvetid på to år. Han er dømd for brot på forureiningslova.
Vesentleg lågare
Dommen er vesentleg lågare enn aktor sin påstand, som var fire års fengsel for dei to hovudtiltalte. Politiadvokat Tarjei Istad i Økokrim sier dette likevel er ein av dei strengaste straffene som er idømt for miljøkriminalitet i Norge.
- Tradisjonelt sett har straffene på miljøområdet vore låge i Norge, det viktigaste for oss er imidlertid at det er knytta eit personleg ansvar til denne alvorlege saka.
Blir anka
Advokat Per Magne Kristiansen som er forsvarar for Trond Emblem seier dommen mot hans klient vil bli anka.
– Dommane er vesentleg lågare enn aktor sin påstand, og det viser at vi har fått gjennomslag for mange av våre synspunkt. Vi kjem til å anke saka, sier advokat Per Magne Kristiansen.
Frikjent for Probo Emu
Begge dei to hovudtiltalte er frikjent for ulovleg import av farleg avfall med skipet Probo Emu.
Bakgrunn
Eksplosjonen skjedde hos Vest Tank i Sløvåg 24. mai 2007. Store mengder illeluktende avfall etter fjerning av svovel frå eit bensinproduket vart spreidd utover bygda. Naboar og tilsette i verksemder i området vart sjuke som følgje av eksplosjonen, og styresmaktene har sett i gang ei helseundersøkelse i området.
Straffesaka mot tidlegare eigar, tidlegare dagleg leiar og mot rådjevaren gjekk for Nordhordland tingrett i vinter.