– Vi meiner saka er styrka gjennom etterforskinga den siste månaden, seier politiadvokat Trond Eide til Bergensavisen.
Det var 4. november at ein 46 år gamal mann vart knivstukke i ein leilegheit i Storms gate på Møhlenpris. Same dag vart sambuaren, ei 41 år gamal kvinne arrestert og sikta for forsettleg drap.
- BAKGRUNN:
Knivdrapet på Møhlenpris
Ber om seks veker varetekt
Den 41 år gamle kvinna har vore fengsla i fire veker sidan drapet 4. november. I morgon vil politiet be om seks nye veker i varetekt for kvinna. Ho nektar framleis straffskuld.
– Delar av etterforskinga har vore retta mot om det kan vere andre gjerningspersonar, men det er ingenting som er kome fram i avhøyr, rundspørjingar og av tekniske undersøkingar som underbygg at andre kan ha gjort seg skuldig i drapet, held Eide fram til avisa.
Kvinna har vore i fleire avhøyr, men stiller ikkje sjølv i fengslingsmøtet torsdag. Ifølge BA vil ho be om å bli sleppt fri.
Politiet har også gjort undersøkingar av knivar som låg i vatn i oppvaskkummen i leilegheita og meiner dei kan ha funne drapsvåpenet.
