Skjåk er ei lita, roleg bygd, 51 uker i året. Men så smell det, ikkje med skarp ammunisjon, men med fest så det brakar. For no er det country-festival i Gudbrandsdalen.
På festivalområdet har mange fått cowboyhatten på hovudet og boots på beina. Det er eit breitt spekter countrymusikk å høyre på arenaen. Tradisjonell country, rockabilly på låven og norske band som Vassendgutane trekker folk.
– Dette arrangementet blir berre betre og betre for kvart år, seier Jeanett Rudrud frå Fåvang.
Ho har vald å reise til Skjåk, fordi ho vil gå på ein festival utan bråk og tull.
Amerikanske trekkplaster
Det er 30 år sia første countryfestivalen vart arrangert i Skjåk, og folk strøymer til festivalområdet.
Av utanlandske trekkplaster er amerikanske Billy Yates og Amber Digby dei store navna på årets festival.
Geir Ove Melby og teamet hans seier at dei skal gjera sitt beste for at eit vaksent, musikkinteressert publikum skal få ei langhelg dei aldri vil gløyme.
Mot ny rekord
Countryfestivalen i Skjåk opplever stor auke i oppslutnad. 30 prosent auke i fjor og 13 prosent auke på forhåndsbestilte billettar i år gjer at den intime festivalen går mot ny rekord.
– Musikken treffer vårt publikum. Det er ein fredeleg og roleg countryfestival. Folk trivst og kosar seg, bråk aksepterer vi ikkje, seier arrangør Geir Ove Melby.
Festivalgeneralen seier det er eit godt miljø for countrymusikk i Skjåk.
Festivalområdet er bygd opp rundt det gamle gardsbruket Skjåkøygard i Nordberg. Garden vart tatt av ras i 1913. Husa vart raskt bygd opp att, og det er dei gamle husa frå tidleg 1900-tal som nå er basis for arenaen.