- Nå blir det party med stor P, seier ein svært glad Jens Wigenstad gjennom sin spesielle talemaskin.
Familien er svært letta etter at dommen kom i ettermiddag, og håper at dei slepp ei ny runde i rettssystemet.
Familien Wigenstad er letta etter dommen
Foto: Runar Henriksen Jørstad / NRK- Utruleg letta
- Det er vanskeleg å beskrive kor glade vi er, seier Jens si mor, Sigrun Wigenstad. Både ho og far Lars er utruleg letta over at Jens endeleg får erstatninga dei meiner han har krav på.
- Dette gjev oss handlefridom, og gjer at Jens kan delta på aktivitetar på linje med annan ungdom. Han har behov for å kome seg ut som alle andre, seier Lars Wigenstad.
I tillegg til erstatninga på i alt 11,6 millionar kroner, må Gjensidige også betale Wigenstad over 400 000 kroner i sakskostnadar.
Rekorderstatning
Jens Wigenstad kolliderte i 2000 på sykkel med ein bil i Lillehammer. Han fekk store skader etter kollisjonen, og sit i rullestol. Han har ei alvorleg hjerneskade, svekka motoriske evner og har mista språket.
Gjensidige har tidlegare gjeve Wigenstad i alt 4,6 millionar kroner. No har tingretten i Sør-Gudbrandsdal bestemt at dei må betale ytterlegare 7 millionar.
Dette er den største erstatningssummen etter ei trafikkulykke i Norge nokonsinne. Cathrine Bråtane hadde den førre rekorden da ho i 2002 fekk utbetalt omlag 11,2 millionar kroner.
Gjensidige vil ikkje kommentere
- Det denne dommen viser er at forsikringselskapet har prøvd seg med eit altfor lågt forsikringsbeløp. Det seier Wigenstad sin advokat, Christian Lundin.
Gjensidige meinte at Wigenstad var så hardt skada at han ikkje har behov for å kome seg ut på aktivitetar, noko tingretten ikkje er enige i.
- Vi ser her at Gjensidige prøver å få dei skada til å godta eit altfor lågt beløp, og håper at dei ikkje har ork til å ta ei runde i rettssystemet for å få det dei har krav på, seier Lundin.
Gjensidiges advokat Ole Andresen har fått dommen, men vil ikkje kommentere den. Han seier til NRK Hedmark og Oppland at han skal lese dommen nøye og ha eit møte med Gjensidige før dei vil uttale seg om saken.
