For den uavhengige distriktsbokhandelen har salet av skulebøker til grunnskulane i Lom og Skjåk vore ein viktig del av omsetninga.
Men nyleg fekk innehavar Tor Arne Rønningen melding om at frå i haust vil kommunane kjøpe bøkene av ein bokhandel på Vinstra. Nokre få tusenlappar skilde tilboda mellom bokhandlane.
Ny anbodsreglar
Nå reagerer Lom og Skjåk bokhandel distriktsbokhandelen på det dei meiner er stivbeinte kommunale anbodsreglar. Nasjonale reglar om offentlege innkjøp skal sikre at leverandørar har sjansen til å vinne anbod, samtidig som det sikrar at kommunane får ein best mogleg pris på det dei kjøper inn.
I dette tilfellet låg Lom og Skjåk bokhandel 3 prosent høgare i pris enn konkurrenten Libris på Vinstra. Rønningen meiner det er meiningslaust at det ikkje blir lagt vekt på historia dei har med å levere skulebøker.
- Kommunen bør støtte opp om den kommunale bokhandelen så prisforskjellane er så små, seier han.
Ikkje noko val
Men administrasjonssjefen i Lom kommune, Ola Helstad, seier ei ikkje har noko val.
- Det er ei eiga lov som regulerer slike prosessar, og der er det ikkje rom for å gjera lokale prioriteringar
Helstad seier dei nå vil setja i gang kurs, rådgjeving og andre tiltak for skal gjera næringslivet i Nord-Gudbrandsdalen meir konkurransedyktige i anbodsprosessane.
Overraska vinnar
Libris på Vinstra, som vann kampen om å levere skulebøker, er einig i kritikken mot korleis dei kommunale anboda blir gjennomførte.
Dagleg leiar Petter Asphoug vart overraska da dei fekk tilslaget.
- Vi rekna med at den lokale bokhandelen fekk tilslaget. Det er viktig at kommunane støtte sine eigne forhandlarar.
For Lom og Skjåk bokhandel er saka viktig.
- Med eit så lite kundegrunnlag som vi har her i Lom og Skjåk, er det berre tidsspørsmål om når vi ikkje lenger finn nye bein å stå på, seier Rønningen.
