NRK Meny
Normal

Slutt for mammografibussen i Oppland

I mars og april køyrer mammografibussen ut til Opplandskvinner for siste gong. Etter det må ein til Lillehammer for å få brystundersøkinga.

Mammografibussen

STOPPAR: Mammografibussen stoppar i vår. Damene som tidlegare har kunne fått brystundersøkinga si her må no reise til Lillehammer.

Foto: Fjell kommune

– Dette var ein trist beskjed å få. Av erfaring veit vi dessverre at når reisevegen blir lang, er det færre som har moglegheit til å nytte tilbodet, seier leiar for mammografiprogrammet Solveig Hofvind i ei pressemelding.

Tidlegare har kvinner i Opplandskommunene Øystre og Vestre Slidre, Vang, Sør-Aurdal, Gran, Jevnaker og Lunner fått besøk av bussen fordi dei bur lengst unna sjukehuset i Lillehammer. Damene på Gran er dei siste som får nytte tilbodet før det blir lagt ned.

Solveig Hofvind

TRIST: Leiar for mammografiprogrammet synest det er trist at bussen legg ned tilbodet og fryktar at færre vel å undersøke seg.

Foto: George Eustice / NRK

Harde prioriteringar

Sjukehuset Innlandet legg ned tilbodet i Vestoppland på grunn av ein krevjande økonomisk situasjon der somatisk sjukehus i Innlandet hadde 100 millionar kronar i minus i 2016.

– Vi måtte finne tiltak for å få eit budsjett i balanse. Mammografibussen har vore eit tilbod mot potensielt friske kvinner og vi prioriterer mot dei sjukaste. Også vil vi bruke helsepersonellet på sjukehusa i staden, seier konstituert divisjonsdirektør, Marianne Berg ved sjukehuset på Lillehammer.

Marianne Berg

ØKONOMI: Ein vanskeleg økonomisk situasjon er grunnen til at mammografibussen sluttar å rulle på vegane i Oppland.

Foto: PRIVAT

Kvinnene får framleis tilbod om brystundersøkinga, men må no reise til sjukehuset på Lillehammer for å gjere det. Ho er klar over at det moglegvis blir færre som vel å gjennomføre undersøkinga når det blir lengre reiseveg.

– Det er beklageleg. Det er ikkje noko vi synest er veldig greitt, men hard prioritering er årsaka, seier ho.

Håpar på nytt tilbod i Valdres

Tor Inge Kristianslund

DÅRLEG NYTT: – I utgangspunktet er det dårlege nyheiter for damene i Valdres, seier Kristianslund. Men no håpar han dei kan få tilbodet på det lokalmedisinske senteret.

Foto: PRIVAT

Kommunelege i Etnedal, Tor Inge Kristianslund har tidlegare jobba for at alle Valdres-kommunane skal få tilbod om mammografi i nærleiken av der dei bur. Han seier det er trist at bussen sluttar å køyre ut, men har samstundes forståing for at Sjukehuset Innlandet legg ned tilbodet.

– Den aller beste løysinga ville vore om det nye flotte lokalmedisinske senteret vårt i Nord-Aurdal kunne fått installert apparatet slik damene i Valdres kunne fått mammografi der, seier Kristianslund.

Det er noko sjukehuset Innlandet faktisk også vurderer ifølge Marianne Berg.

– Vi diskuterer korleis vi kan legge fleire tilbod til dei lokalmedisinske sentera. Det er absolutt noko vi vurderer framover, seier Marianne Berg.

SISTE NYTT FRA HEDMARK OG OPPLAND

Video fra Hedmark og Oppland

Elena fra Lillehammer er opptatt av de små bedriftene
Nils Thore Jansson fra Finnskogen mener mye om mangt, særlig om politikere og sentralisering.
Bar Hassan fra Follebu skal stemme for første gang