– Må sjå på Birken som 50 sprintrenn

Øystein Pettersen er blant dei mange toppløparane som har teke plass i eliteklassa under årets birkebeinerrenn. Han meiner det er viktig å gløyme at det er over fem mil over fjellet.

– Eg må sjå på det som femti sprintprologar. Og eg er jo ganske brukbar i sprint, så får vi sjå kor mange sprintar eg held. Eg er litt usikker på korleis det blir å gå så mange på rad.

• Gå heile løypa frå sofakroken
• Birkens egen supermann

– Heldt på å stryke med i fjor

Med 16.000 til start meiner Pettersen at det må vere nokon som er enda dårlegare førebudd enn han, og at det blir ei god trøst over fjellet.

– Eg gjekk i fjor og heldt på å stryke med, så da var det ingen grunn til å ikkje melde seg på i år. Planen er å kome seg opp i front og bremse feltet. Men eg vart litt skuffa da eg såg at det var fleire enn eit spor.

Spørsmålet er om det er ein taktikk som vil klare å halde langløpskanonane bak heilt til mål. Ved sidan av Pettersen på start står ein som nok må reknast som ein langt større favoritt til å vinne. Jørgen Brink vann Vasaloppet, og vil gjerne også vinne birken.

– Eg vart nummer to i fjor, så eg vil gjerne vinne. Men eg kjenner meg ikkje i toppform, det har vore lite trening og mykje anna etter Vasaloppet.

• – Han skal få ein av sine tyngste dagar
• Alt om Birkebeinerrennet 2012

Skuffa over startnummeret

Den elles så optimistiske og positive Øystein Pettersen fekk seg ein liten nedtur da han kom til start.

– Eg er den einaste som har fått papirnummer, alle andre har ordentlege startnummer. Så eg er litt snurt og det er dårleg stemning.

Han prøvar likevel å snu nedturen til noko positivt, for eit dårlegare startnummer enn dei andre gjev ei god unnskyldning dersom det går dårleg.

–Det går jo ikkje an å gå fort med papirnummer. Det er organisk og dersom eg brukar meir enn fire timar så smuldrar det opp, så det er eit tidspress.