Vil verne villrein mot moskusturistar

– Vi har hatt store forskingsprosjekt som viser at villrein toler litt forstyrring, men om ferdselen blir for stor, skygger han unna. Den terskelen har vi nå nådd på trafikken innover i Stroplsjødalen, fortel Arne Johs. Mortensen i Statens naturoppsyn.

I mange år har Statens naturoppsyn halde teljinga på kor mange som ferdast i området. Tala viser at rundt 10.000 moskusturistar går inn frå Kongsvoll kvart år.

Vil verne sårbare område

Formålet med den nye moskusstien er å redusere den totale trafikken inn i Snøhetta-området. Samtidig som det er eit ynskje om å legge til rette for at turistane skal oppleve Dovrefjell og Sunndalsfjella

– Poenget er å legge opp ein ny sti som gjer at besøkjande kjem inn i nasjonalparken samtidig som dei ikkje kjem for langt inn i sårbare område, forklarar Mortensen.

Hestar har tråkka stien

Den nye stien går frå Kongsvold fjeldstue til Grønbakken. Traséen har vorte rydda med sag, og eit hestefølgje har gått opp stien.

Stien er på 14 kilometer, om ein går heile runden, men det finst fleire valmoglegheiter, og for dei som ikkje vil gå så langt. For å sjå moskusen, er den kortaste traséen på 2,4 kilometer.

– Vi vil halde fram teljinga for å sjå korleis stien påverkar ferdselen, og om den får den effekten vi ynskjer, seier Mortensen.