Berlin Wall heiter den nye låta, som er skriven av svenske Karin Park. 18 år gamle Nora gler seg til å framføre den for aller fyrste gong under det direktesendte finaleshowet på NRK1 i morgon kveld.
–Det er ein heilt ny song som ingen har høyrt før. Det blir veldig spennande, men kanskje litt skremmande også, seier Nora til NRK.
På photoshoot
Vi er med Nora på såkalla photoshoot i Drammen. Bilder som skal pryde coveret til den nye låta må på plass før finalen går av stabelen. Manager Daniel Hamnes har kontroll på det meste, og Nora går frå frisørstol til sminkestol før alt er klart.
-Sånn er det, seier Nora, når ein vel å leve eit slikt liv.
Det har gått i høgt tempo dei ti vekene Stjernekamp har pågått, men Nora understreker at det har vore ei stor oppleving.
–Eg har møtt så mange fantastiske menneske, og lært utruleg mykje. Eg har verkeleg ikkje lyst til at det her skal slutte. Det kan godt vare i fem veker til, smiler Nora.
Fest i Gjøvik
I Gjøvik blir det stor fest i den største kinosalen i kulturhuset under finalen i Stjernekamp. Der blir det visning på stort lerret og ikkje minst god lyd. Arrangementsansvarleg Marte Skoglund har plass til over 500 personar, og håpar på fullt hus.
–Vi vil først og fremst at folk skal få oppleve dette saman. Nora er ein fantastisk ambassadør for byen vår, og no skal vi gjere vårt for å heie henne fram. Det blir gratis inngong, så no må folk gå mann av huse!
Nora blir nesten mållaus når manageren fortel henne om initiativet frå Gjøvik.
–Du tullar med meg no, er alt ho får fram.
Men ho er utruleg glad for støtta ho får frå heimkommunen:
-Eg føler at eg har Gjøvik med meg, og det er ei kjempedeilig kjensle.
LES OGSÅ:
Forkjøla
Men ein liten forkjølelese kan kanskje skape trøbbel for Nora i finalen. Då NRK var med på ei av dei siste øvingane før generalprøva, måtte Nora avbryte midt i songen.
-Sorry, altså, men stemma mi er øydelagt no. Eg har ikkje kontroll over den lenger.
Nora var tydeleg frustrert, men då vi fekk snakka med henne litt seinare, var ho raskt med å få fram at det ikkje er grunn til uro:
–Neida, eg er ikkje bekymra. Stemma mi byrjar å bli litt brukt, men dette går bra. Dette får eg til.
Finalen i Stjernekamp går direkte på NRK1 laurdag kl 1955.