I går vart det klart at Per Brogeland tek over som Kongsvingertrenar for tredje gong. Klubben rykka ned frå Eliteserien i haust, og trenar Tony Gustavsson gav seg.
Men sjølv om Brogeland akkurat er attkomen til Kongsvinger, har han klare planar for laget.
– Kongsvinger er ein toppklubb som høyrer heime på toppnivå. Vi ynskjer å kome oss attende til Eliteserien. Om det ikkje blir allereie neste år så ved eit seinare høve.
Opp- og nedturar
Brogeland kom fyrst til klubben i 1992, og tok laget til seriesylv og cupsemifinale i sin fyrste sesong. Han kom attende til klubben i 1998, men måtte gå etter at klubben rykka ned i 1999.
– Kongsvinger har vore ein viktig klubb for meg. Det har vore både opp- og nedturar, men eg har så mange gode vener og såpass godt forhold til KIL at det blir moro å kome attende.