Her går dei på ski til jobb

– Det er den fantastiske vinteren og de forholda som er i og rundt sentrum no som gjorde det mogleg, seier Asgeir Linberg.

Han tok nemleg initiativ på Facebook til at folk på Lillehammer skulle gå på ski til jobben. Og fleire fant fram skia fredag morgon.

– Eg trur ikkje det er mange som har moglegheita til ha på seg skia heime og gå på ski heilt til jobben. Det er ein fin måte å starte dagen på, seier Morten Thorsrud.

Vil vere skibyen

Fleire alpinanlegg og skisenter har opplevd ei stor auke den siste perioden, og den stort sett snøsikre Lillehammer-regionen er blant dei som opplever aukande pågang.

– Det var eit fantastisk godt initiativ om å gå på ski på jobben i dag. Vi har snø i heile byen og fantastiske forhold, så vi vil at Lillehammer skal vere skibyen, seier Ove Gjesdal, dagleg leiar i Visit Lillehammer.

Initiativtakaren meiner det er lite igjen før byen verkeleg kan kalle seg sjølv for skibyen.

– Det er ikkje heilt lagt til rette for å gå på ski i sentrum. Det er så lite som skal til før Lillehammer er helt komplett som skiby, seier Linberg.

Snø, kulde og kanskje ekstremvêr

Til helga kan det bli fint skivêr mange stadar. Det har allereie kome mykje snø blant anna på Austlandet, og no kjem det kalde og fine vêret.

– Da får vi den første høgtrykkssituasjonen på lang tid, på same tid som vi får kalde luftmassar ned frå nord. Det betyr kaldt og fint ver, med temperaturar mellom minus ti og minus tjue gradar, seier statsmeteorolog Ida Fossli ved Meteorologisk institutt.

I Møre og Romsdal og Trøndelag er det fare for orkan og vindkast på opp mot 40 meter i sekund i helga.

Nord-Norge blir liggande nord for høgtrykket, og ser ut til å få nordvestleg vind og snøbyer.