– Pakk påskesekken med både solbriller, solkrem, vindtett og vasstett, seier meteorolog Eldbjørg Moxnes.
Skal du opp i høgda i ferien, kan du trygt pakke med deg skiskoa også.
Sein påske
Den seine påska i år gjer at ein merkar meir til snøsmeltinga enn om påska hadde komme tidlegare, meiner meteorologen.
Og våren er kommen for å bli mange stader. I Sør-Noreg er det mindre snø enn normalt, men i Nord-Noreg er det faktisk omvendt.
– Dei varme dagane vi har hatt mange stader gjer at det går nedover med snømengda. Det held fram med varmegrader på dagtid, men skiføret forsvinn ikkje. Ein har sjansen til å gå på ski også i påskeferien, seier Moxnes.
Slik er skiføret
Det vil ikkje komme meir snø i dei lågareliggande strøka. Utover i påskeveka vil det komme litt nedbør som regn somme stader, sjølv om temperaturane skal gå litt ned.
Skal ein ta skia fatt kan det vere lurt å utstyre seg med klister.
– Den nye trenden er jo felleski som funkar bra. Elles er det standard påskemiks som gjeld med klister og kanskje litt tørrvoks, seier meteorologen.
Ein kan følge med på oppdaterte kart over snømengd, skiføre og nysnø på senorge.no utover i påskeveka.
Snøen minkar gradvis
På yr.no kan ein sjå oversikt over snømengdene i centimeter fleire stader i ditt fylke. Det blir teke målingar ved dei mange målestasjonane og tala blir oppdatert fortløpande.