– Det er veldig kjedeleg å miste streaken, seier Viktoria Kvalheim Larsen (15) og får støtte frå klassekameratane.
Ein «snapstreak» er når ein har sendt Snapchat til kvarandre kvar dag over tid, og desse 9.-klassingane på Lillehammer har samla opp lenge.
– Alle andre gjer det
Når ein har ein streak med nokon dukkar det opp eit flammeteikn i Snapchat og ein kan sjå talet på kor mange dagar ein har snappa fram og tilbake samanhengande.
Ungdommane har opp til 40 personar dei må sende snappar til kvar dag og det er ingen annan vinning enn å kunne følge med på talet som aukar.
– Eg synest det er kult å ha dagar med folk og alle andre gjer det, seier Filip Ziolko.
Og skulle ein hamne utanfor internettforbinding i eit døgn så er ikkje det nokon hindring. Då hjelper dei kvarandre.
– Då får eg nokon andre til å logge inn på brukaren min og sende snap til dei eg har streak med, seier Ådne Ulset.
– Forstå at det er viktig
Førsteamanuensis, Anne Mette Bjørgen på avd. for pedagogikk og sosialfag ved Høgskulen i Innlandet meiner vi bør prøve å forstå at sosiale medium er viktig for ungdommane, men at det også må finst køyrereglar.
– Det betyr mykje for dei å pleie vennskap og liknande. Og for å vise fram kven dei er og kva dei er interesserte i, seier Bjørgen.
Ho trur ikkje ungdommane tek skade av å vere avhengige av å sende Snapchat kvar dag og poengterer at alle er forskjellige. Det er ikkje nødvendigvis slik at det betyr så mykje for alle, meiner ho.
– Som så mykje anna kan det gå over også. Vi hugsar vel alle Tamagotchien på 90-talet som vi måtte vatne over sommarferien så den ikkje skulle døy, seier ho.