Eit jordbruksoppgjer står for dørene, og nær sagt som vanleg er det stor skilnad mellom kravet frå bøndene og det staten har å tilby. Jordbruksorganisasjonane har likevel gått med på å starte forhandlingar.
Landbruket står for 25 prosent av verdiskapinga i Nord-Østerdal, og dei åtte ordførarane i den såkalla Fjellregionen har sendt brev til landbruksminister Trygve Slagsvold Vedum og Karl Eirik Schjøtt-Pedersen, der dei ber om eit godt jordbruksoppgjer.
– Vi oppfordrar regjeringa om å strekke seg langt i å legge til rette for den jobben bonden gjer. Det treng vi, skriv ordførarane i Tolga, Alvdal, Folldal, Rendalen, Os, Tynset, Røros og Holtålen i brevet.
Dei peikar også på at landbruket er meir enn ei næring, og også er viktig for kulturlandskapet, matkulturen, tradisjonar og identitet i området.