– Vi ligg jo nærare Troms enn Vadsø. Vi har vel så mykje å tene på å samhandle med Troms på mange område, seier leiar i Alta Frp, Odd Erling Mikalsen.
Stortinget sine to vedtak frå i fjor om at Finnmark skal slå seg saman med Troms frå 1. januar 2020, har ført til ei svært oppheita stemning i Finnmark denne vinteren.
Både politikarar, kjendisar og andre innbyggjarar har tatt til orde for at Finnmark bør halde fram som eige fylke. Og midt i mars bestemte fylkestinget å setje samanslåingsprosessen med Troms på vent – heilt til innbyggjarane har fått sagt sitt i ei folkerøysting 14. mai.
Ikkje alle i Finnmark er for å reversere samanslåinga med Troms. Men skulle Finnmark likevel få halde fram som eige fylke, vil altså Alta Frp at fylkets klart største by i staden sluttar seg til Troms.
Og det bør avgjerast i ei ekstra folkerøysting 14. mai, same dag som innbyggjarane i heile fylket skal ta stilling til samanslåinga med Troms.
Uvêret argument for Troms
Ein del av grunnlaget for utspelet er uvêret i Nord-Norge denne påska. I fleire dagar var det til dømes umogleg å kome seg med bil frå Alta til Hammerfest, der sjukehuset i Vest-Finnmark ligg.
– Dei sit der på eit varmt kontor i Oslo og ser at det er 14 mil frå Hammerfest. Her kan det ikkje vere meir enn eitt sjukehus, tenkjer dei. Men dei har ikkje sete vêrfaste i ein bil over Sennalandet. Det er kvardagen til altaværingane. Derfor må vi vurdere om det er betre å ha UNN (sjukehuset i Tromsø) som lokalsjukehus for Alta framfor Hammerfest, meiner Mikalsen.
Blanda tilbakemeldingar
Utspelet til Frp-leiaren møter blanda tilbakemeldingar blant dei andre politiske partia i Alta.
Gruppeleiar for Venstre, Trine Noodt, meiner det er eit sprekt forslag å inkludere fleire forslag i ei folkerøysting. Men ho trur ikkje Alta har økonomi til å bli ein del av Nord-Troms.
Høgre-leiar Laila Davidsen meiner på si side at politikarane i Finnmark må sjå framover og jobbe for ein best mogleg region saman med Troms, i staden for å heile tida legge inn nye snubletrådar.
Alta-ordførar Monica Nielsen (Ap) synest det er svært interessant at det er nettopp Frp som kjem med forslaget om ei ekstra folkerøysting 14. mai.
– Om Frp har fått signal frå eiga regjering om at dei er i ferd med å snu, så håper eg vi får den informasjonen relativt kjapt. Vedtaket om samanslåing er gjort to gonger i Stortinget. Problemstillinga er først aktuell om Finnmark held fram som eige fylke, seier Nielsen.