På grunn av endra kamptider vurderte leiinga i Drammenslaget det som betre å skaffe seg eit eige fly i staden for hotellovernattingar for laget og staben.
Det kjem fansen til gode.
- Vi forsøker å komme oss av garde til kamp og tilbake same dag, for då slepp spelarane å overnatte for mange dagar på hotell. Dessutan sparer vi pengar på den måten. Men då fotballforbundet framskunda kamptidspunktet vart det vanskeleg ved å nytte rutefly, seier dagleg leiar i Strømsgodset Erik Espeseth.
Flyselskapet Strømsgodset
For å fylle opp flyet har Strømsgodset fridd til fans og sponsorar. Med nærare 80 sete i flyet er det plass til også dei som skal skape stemning rundt grasmatta. For eit par tusenlappar får fansen fly og buss til kampen. Motstandar i kvartfinalen i NM er Ranheim, som spelar i førstedivisjon.
- Det blir bare hjarte som banker i blått på det flyet, flirar Espeseth. Oppover kjem stemninga til å bli spent og litt smånervøs. Nedover frå kampen, dersom det går bra, kjem flyet omtrent til å flyge av seg sjølv.
Leiaren er meir usikker på korleis det blir med humør og stemning i eit trangt fly dersom Ranheim skulle slå Strømsgodset ut av cupen i kvartfinalen. Det blir kort veg frå fans til slitne spelarar dersom vonbrotne supportarar treng å gi nokre klare meldingar til eit tapande Drammenslag.
Les:
Ronny Deila (i midten) tar med seg spelarane og flyg med fansen.
Foto: Lien, Kyrre / SCANPIX- Da trur eg det blir dystert
Ranheim ligg på tredjeplass i førstedivisjon, medan Strømsgodset ligg på femteplass i eliteserien. Det kan bli ein tett kamp kor begge lag har mykje å tape ved å ryke ut. Strømsgodset mest av begge.
- Eg trur det kjem til å bli ein særs spanande kamp. Ranheim er som Strømsgodset eit lag som har overprestert i høve til økonomi og ein del andre faktorar. Det er ingen grunn til å undervurdere motstandaren, seier Espeseth.
Det finst visstnok enno eit titals ledige seter hjå Flyselskapet Strømsgodset. Det gjenstår å sjå korleis stemninga blir blant chartersupportarane på veg heim frå Trøndelag.
