Brannsentralen Vestviken 110 melde rett før klokka 17 torsdag om kraftig røykutvikling i det kuperte terrenget ved Austvollnatten i Flå.
Brannmannskap kom ein time seinare fram til området som står i brann.
– Eit helikopter er no rekvirert for å få oversikt over brannen, seier Glenn Espen Kustner, vaktsjef ved Vestviken 110-sentralen i 20-tida.
Både brannmannskap og frivillige deltar
16 brannfolk, med hjelp frå fleire frivillige, jobbar med å avgrense brannen frå fleire kantar.
– Det er vanskeleg å få oversikt over heile brannområdet. Nokre plassar ligg det snø i skuggesidene i terrenget, og der vil brannen slokne av seg sjølv, seier Kustner.
Ifølge politiet i nordre Buskerud skal det dreie seg om eit område som strekk seg over fleire hundre meter.
– Politihelikopteret har sveipa over brannområdet og brannvesenet melder no at dei har tilnærma kontroll, seier operasjonsleiar Jarle Hopperstad i politiet seint torsdag kveld.
Mange forbipasserande, som ser den kraftige røykutviklinga frå riksveg 7, ringer til brannsentralen Vestviken 110.
Sentralen ber om at publikum ikkje tek kontakt om røykutviklinga i området, slik dei får konsentrert seg om å koordinere sløkkearbeidet på staden.