Brødet som 12-åringen åt, skulle ha vore skriftleg merka med åtvaring om allergena. Det krev ei ny forskrift frå desember 2014. Allergen er ingrediensar som kan framkalle allergi. Ein 12-åring måtte sendast på sjukehus med allergisjokk i februar i år etter å ha spist nøttebrød.
Beklagar at brødet ikkje var merka
Hotelldirektør Gro Odden ved Dr. Holms Hotell beklagar at maten ikkje var merka.
Det er ikkje så lett å sjå om brød inneheld allergen, det vil seie ingrediensar som kan framkalle allergiske reaksjonar.
Foto: Tobias Sakrisvold Martinsen– Vi har fått strenge krav om å merke all mat, men i dette høvet var det ein kurv med brød som vart sett ut framfor gjesten. Vi gav dessverre ikkje beskjed om at det kunne innehalde nøtter, seier Odden.
Må merke alt
Seniorinspektør i Mattilsynet i Hallingdal, Hilde Frølich, seier at kravet om skriftleg merking er ganske nytt, så myndigheitene har ikkje full oversikt over korleis reiselivsbedriftene har fylgd opp dette.
– Kravet er akkurat sett i verk, så vi har ikkje full oversikt over korleis spisestadane gjennomfører regelverket. Nå har bransjeorganisasjonane sjølve vore på banen og spreier informasjon. Vi kjem til å ha fokus på merking av allergen framover, seier ho.
Har endra rutinane
Hotelldirektøren seier at hotellet no har gjort sitt yttarste for å følgje reglane om skriftleg merking av mat som har spor etter allergen. Alt av matvarer som er pålagt skriftleg merking, skal merkast.
– Vi har merka alt frå frukostservering til kveldsbufear, restaurantmenyar og meir til – med informasjon om dei fjorten allergena vi har plikt til å opplyse om, seier ho.
