Men Hemsedal kommune er førebels noko skeptisk til hytteplanene til dei to bøndene i bygda.
Det omsøkte hyttefeltet ligg på delar av stølseigedommane på Muren og Brandvollstølen i Grøndalen.
Grunneigarane Knut Fausko og John Wøllo har sendt ein førespurnad til kommunen for å høyre om det er grunnlag for å utarbeide ein reguleringsplan for området.
Pengar frå eit eventuelt sal av tomter vil dei bruke på utvikle Fausko skysstasjon og garden Brandvoll Søre. På Fausko ønskjer dei å byggje gjesterom og kultursal. Det er også aktuelt å setje i gang produksjon av økologisk kjøtt frå ammekyr.
Administrasjonen i Hemsedal kommune frårår at det blir utarbeidd ein reguleringsplan.
Dette fordi området pr. i dag er eit landbruks-, natur- og fritidsområde, der det ikkje er lov å setje opp nye bygg. Samstundes er kommunen i startgropa for å vurdere hyttepolitikken, og forslaget frå Fausko og Wøllo blir sendt til kommuneplannemnda som eit innspel i samband med revidering av kommuneplanen.
Saka skal opp i hovudutvalet for plan og ressurs i Hemsedal torsdag 17. april.