– Dette er noko me har kjempa for i snart ti år. Det er ein litt uverkeleg følelse at me har komme so langt at det har blitt eit faktum, fortel Unni Tobiassen Lie.
Det er no ti år sidan sonen hennar døde på sjukehuset i etterkant av ein kneoperasjon. Sjølve operasjonen gjekk fint, men han vart liggande utan tilsyn med store mengder smertestillande ifylgje konklusjonen til politiet.
– Det har vore ein lang og tung kamp. Det er ein siger og ein milepæl.
To familiar og mykje pågangsmot
Dei har ikkje vore aleine i kampen. Familien Bistrup mista dottera si i ei anna alvorleg hending i helsevesenet. Helseminister Bent Høie trekk fram at utan desse to familiane hadde det ikkje vore noko undersøkingskommisjon.
– Det var deira ide og det har vore deira kamp. Dei har bidrege til å endra norsk helseteneste.
Statens undersøkingskommisjon for helse- og omsorgssektoren (UKOM) opna i dag i Stavanger. Oppgåva deira er å undersøkja alvorlege hendingar i helsevesenet.
– Det er for mange i dag som blir skada og døyr som fylgje av feil i helsetenesta. Denne kommisjonen skal bidra til at me lærer av feila, seier helseministeren.
Skal presentera rapportar offentleg
UKOM skal inn og undersøkja 20 alvorlege hendingar i året. Rapportane frå undersøkingane blir delt med helsetenesta og offentlegheita. Direktøren for den nye kommisjonen, Pål Iden, seier at dei skal anonymisera det dei må slik at det kan presenterast offentleg.
– Det arbeidet me skal i gang med er noko som vil setta spor i helsetenesta framover. Det er vår klare ambisjon, fortel direktøren.
Kommisjonen har ikkje makt til å ta frå nokon autorisasjon og skal ikkje ta stilling til skyld i sakene dei undersøkjer.
Må snu kvar ein stein
Begge familiane bak initiativet har tydelege oppfordringar til kommisjonen i arbeidet dei skal til med.
– Dei må vera modige, ikkje tafatte. Dei må inn i sakene og snu kvar ein stein, oppfordrar Solveig Bistrup.
– Ver der det skjer, ikkje sit og vent, seier Tobiassen Lie.
– Det viktigaste er å få sanninga på bordet slik at ein kan skapa læring i helsevesenet.