– Mange er framleis i ein sorgprosess, fortel ordførar i Hole, Per Berger (H), og legg til at hendinga på Utøya enno ligg veldig nært i tid, og dei pårørande i kommunen har gitt uttrykk for at det er altfor tidleg for dei å halde seg til eit minnesmerke allereie no.
- Les også:
- Les også:
Anonym gåve
Innan 10. februar må 56 kommunar bestemme seg om dei vil ta i mot gåva frå ein anonym givar, ein skulptur laga av Nico Widerberg. Skulpturen skal avdukast i alle kommunar på eittårsdagen til 22. juli, som eit minne over dei som mista livet.
Ordføraren synest sjølv det har vore vanskeleg å ta stilling til denne gåva, men etter å ha rådført seg med kommunestyret, har han no endeleg bestemt seg for å takke nei.
– Det er jo ille å seie nei til ei gåve, men omsynet til dei pårørande veg tungt, seier Berger. Dessutan er det vanskeleg å plassere ein slik skulptur før me veit kor i kommunen vår det nasjonale minnesmerke skal stå.
- Les også:
Artikkelen held fram under biletet.
Nasjonalt minnesmerke
Omtrent samstundes med at tilbodet frå den anonyme givaren kom, bestemte Regjeringa at det skulle settast opp to nasjonale minnesmerke over 22. juli. Eit i Oslo og eit i Hole. Minnesmerka skal heidre omkomne, overlevande, hjelpemannskap og frivillige.
Ei nasjonal styringsgruppe vart oppretta for å sjå på utforminga av minnesmerka og kor dei skal plasserast. Gruppa, som blir leia av Åse Kleveland, skal leggje fram sitt forslag til Kulturdepartementet innan 1. april.
– Dette minnesmerket skal ikkje settast opp i år, men når tida er moden for det. Det kan dreie seg om mange år fram i tid, trur ordføraren, som fortel at styringsgruppa allereie har gjesta kommunen fleire gonger for å sjå på stader dette merket kan plasserast.
Dei fleste takkar ja
Det er KS, kommunesektorens organisasjon, som administrerer gåveutdelinga frå den anonyme givaren. Førebels er det ingen andre enn Hole og Oslo som har signalisert at dei takkar nei, opplyser presseansvarleg i KS, Kjell Erik Saure.
– Mange har allereie takka ja og nokon har bede om å få vente med å bestemme seg til dei har fått avvikla neste kommunestyremøte, seier Saure.
Holeordføraren har ikkje rådført seg med andre ordførarar enn Fabian Stang i Oslo. Det ser ut som begge desse kommunane følgjer kvarandre. Dei vil prioritere det nasjonale minnesmerket, og ta omsyn til dei pårørande og bruke tid når det gjeld eventuelle andre minnesmerke.
– Er det eit problem at givaren er anonym?
– Det er nok nokon som kjenner seg litt usikre når det gjeld akkurat dette, men kommunen har ikkje lagt vekt på den problematikken då, seier Berger.
– Som åstad for dei grufulle hendingane, vil jo også Utøya alltid liggje der som eit minnesmerke i seg sjølv, fastslår ordføraren.