– Stemma er i full vigør, den er betre enn nokon gong trur eg, gliser 92-åringen.
Han er klar for ein spesiell framferd, på ein heilt spesiell dag.
– Eit brus av ei anna verd
For 73 år sidan var Helge Birkeland ein lovande solist og presteson i Skoger like utanfor Drammen.
Det siste halvåret av krigen var 20-åringen med å planlegge ein stor konsert i Drammens Teater. Konserten blei lagt til 8. mai. Lite visste Helge og dei andre om kva slags dato det skulle bli i norsk historie.
Men da han sette seg på sykkelsete og sykla dei rundt ti kilometrane til Drammen for generalprøva dagen før forstod kva han som var i vente. For fyrste gong på fem år såg han det norske flagget bli heist frå mange hus.
– Det var flagg på kvart einaste hus. Folk gjekk rundt i bunader og ropte. Det var eit brus av ei anna verd, fortel mannen som fyller 93 i haust.
Held framleis konsertar
Konserten gjekk som planlagt, med eit publikum solisten nok aldri seinare såg maken til.
– Det var for kort tid til å begynne å forandre på konserten. Men det er klart det blei ein ekstra dimensjon til konserten. Alle hadde tatt med flagg. Folk jubla og klarte nesten ikkje å vere stille. Det kunne gått så dårleg som berre det, den dagen, men det blei berre jubel, fortel Birkeland.
I dag var Helge tilbake i Drammen og i Skoger kyrkje. Det var igjen tid for konsert og sjølvsagt ville Helge igjen vere solist.
Framleis er han i full sving som songar og denne kvelden hadde han vald ut «Swing Low, Sweet Chariot» og salmen «Jeg løfter opp min gud min song».
– Eg syng framleis rundt omkring og er i storform som songar, smiler solistveteranen.