– Det aukar år for år, fortel avdelingsleiar i Transportøkonomisk institutt, Kjell Werner Johansen.
– I 2010 vart om lag 7,5 milliardar bompengar betalt inn. I år ser det ut til å bli mellom 10 og 11 milliardar kroner.
Auka med 2,5 milliardar
I utgangen av 2017 var det 60 prosjekt med bompengar som finansieringsmodell i Noreg og 237 forskjellige bomstasjonar rundt på norske vegar.
Ein stor kontrast til korleis det var å vere norsk bilist før tusenårsskiftet. På slutten av 80-talet var Kjellstadbommen i Lier den einaste på heile E18 frå Oslo til Kristiansand.
I 2001 blei den utskjelte Lierbommen som alle som skulle til Oslo via E18 måtte gjennom, endeleg stengt.
Prisen for å passere bommen i 2001 stengde var 15 kroner. Det svarar til om lag 21 kroner i dag. No er E18 heimen til 22 ulike bomstasjonar.
– Me har fleire bomstasjonar, fleire bompengeanlegg og meir utbygging av veginfrastruktur som er finansiert med bompengar, fortel Åge Jensen, avdelingsdirektør i Vegdirektoratet.
Sidan 2010 har det totale beløpet av innbetalte bompengar per år auka med om lag 2,5 milliardar.
Fleire stadar i landet protesterer folk mot bompengar og auke i bomprisar. I Drammen, Kristiansand og Fredrikstad var det bompengeaksjonar av ulike slag tidlegare i veka.
Forstår frustrasjonen
Statens vegvesen registrerte 654 millionar passeringar gjennom bomstasjonar og ferjer i 2017. Den gamle bommen i Lier registrerte over 200 millionar bilar gjennom side 26 år i drift.
Samferdselsminister Jon Georg Dale (Frp) fortel at han forstår frustrasjonen til folk som protesterer mot bompengar.
– Eg forstår at det er ei toleransegrense for kor mykje bompengar me skal ha.
Han fortel at regjeringa jobbar for å få ned belastninga frå bompengar på bilistane, men møtet med motstandarane ser han ikkje på som den tøffaste oppgåva.
– Den aller vanskelegaste jobben eg har er å ha eit stort nok tempo i utbygginga av nye vegar og jernbaneprosjekt slik at vanlege folk får ei enklare kvardagsreise. Ogso skal eg forsøkja å halda kostnadane nede.