NRK Meny

«Fjordman» vil blogge frå rettssaka

ÅLESUND (NRK.no) Den islamkritiske bloggaren «Fjordman» vil blogge frå rettssaka mot Anders Behring Breivik. – Eg har ein plan om å skrive frå dette mediesirkuset, skriv han i eit nytt blogginnlegg.

Rettssaken Anders Behring Breivik

«Fjordman» meiner rettssaka mot Anders Behring Breivik utviklar seg til eit mediesirkus. Sjølv varslar han at han vil blogge frå rettssaka.

Foto: Junge, Heiko / SCANPIX

Artikkelen er flere år gammel.

«Fjordman», eller Peder Nøstvold Jensen som han heiter, blei dregen fram som ein viktig inspirator for Anders Behring Breivik kort tid etter terroraksjonen 22. juli. I manifestet sitt siterte Anders Behring Breivik «Fjordman» 111 gonger. No er «Fjordman» kalla inn som vitne, noko han reagerer sterkt på, ifølgje det siste blogginnlegget hans på nettstaden EuropeNews.

– Eg skulle gjerne ha hatt høve til å gå inn i ei Breivikfri sone. Men dessverre har eg ikkje noko val. Eg må følgje saka i eit par dagar, i og med at eg blei dregen inn i denne forferdelege saka mot min vilje. Eg er blitt spurt av forsvararane til Breivik om å vitne i saka, skriv Nøstvold Jensen.

– Bloggar om rettssaka

I det siste blogginnlegget sitt siterer Nøstvold Jensen ei rekkje personar som har uttalt seg om saka. I hovudsak er dette sitat som byggjer opp under ein konklusjon om at rettssaka er konstruert som eit mediesirkus. Han varslar at han kjem til å skrive om det han kallar eit mediesirkus på internett.

– Eg har ein plan om å skrive om dette mediesirkuset som kjem ut av denne forferdelege saka, inkludert informasjon om dei andre vitna og om den politiske bakgrunnen i den vesle nasjonen min og i den vestlege verda, skriv bloggaren.

Vil ikkje svare NRK

NRK har i dag forsøkt å få ytterlegare kommentarar frå «Fjordman». Han ønskjer imidlertid ikkje å svare på spørsmål frå NRK.

– Jeg har dessverre ikke tid til å svare alle journalister akkurat nå og misliker dessuten sterkt den uhederlige politiske kampanjejournalistikken NRK som institusjon har vist i denne saken, og ofte i andre sammenhenger også, skriv «Fjordman» i ein e-post til NRK.

– Ein av dei viktigaste ideologane

«Fjordman» er av mange peika på som ein av dei viktigaste ideologane i den anti-islamske rørsla i Europa. I eit oversyn som er utarbeidd av ein antirasistisk britisk organisasjon, blir «Fjordman» rangert som ein av dei tolv mest innflytelsesrike ideologane i denne samanhengen.

– På grunn av internett organiserer dei seg på ein annan måte enn tidlegare. Meiningane til «Fjordman» dukkar opp over alt. Han har skrive på Gates of Vienna-bloggen og på English Defence League sin blogg, seier ekspert på det høgreekstreme miljøet i Europa, Nick Lowles til NTB.

– Påminning om smerte og sorg

I innlegget sitt har Peder Nøstvold Jensen fleire kritiske merknader til vitnelista. Han skriv at lista kan vere med på å gjere rettssaka til ei mellomting mellom eit sirkus og politisk underhaldning.

– Bak denne mediehendinga treng vi ei påminning om at der er smerte og sorg i dusinvis av familiar som aldri meir kjem til å få sjå sine kjære att på grunn av dei vonde handlingane til Anders Behring Breivik i juli 2011, avsluttar Peder Nøstvold Jensen i innlegget sitt på nettstaden EuropeNews.