Dette sverdet kan ha tilhøyrt sjørøvarkaptein Svartskjegg

Utanfor kysten av North Carolina har amerikanske arkeologar grave fram restar av eit sverd i vraket av sjørøvarkapteinen Svartskjeggs skip Queen Annes' Revenge.

Svartskjegg, som eigentleg heitte Edward Teach, var ein frykta sjørøvarkaptein som herja i Vestindia og på austkysten av det som i dag er USA på byrjinga av 1700-talet.

Svartskjegg og hans liv har blant anna gitt inspirasjon til Blackbeard-karakteren i den siste Pirates of the Caribbean-filmen On Stranger Tides i tillegg til ei mengde andre bøker og filmar.

• Les også: Holdt på å rote bort topphemmelig Pirates-manus
• Les også: Manusforfatter forlater piratskuta
• Les også: Krympet magen til Cruz

Gullforgylt

Sverddelane som arkeologane har grave fram frå vraket, består av to bitar av skjeftet på sverdet. Sjølve knivbladet manglar, bortsett frå ein liten bit som sit fast på skjeftet.

Skjeftet er laga av ei koparlegering som opphavleg har vore forgylla med gull, fortel arkeolog og konservator Wendy Welsh ved North Carolina Cultural Department til NRK.no.

–Vi kan ikkje seie kven dette sverdet har tilhøyrt. Det finst dessverre ingen innrissa initialar som B. eller E.T. som tilseier at det er kaptein Svartskjegg sitt, seier Welsh.

Men arkeologane ved QAR prosjektet er 99,9% sikre på at skipsvraket er skipet til kaptein Svartskjegg, så dei kan heller ikkje utelukke at dette var hans sverd.

–Dei to sverdstykkja er grave fram på ulike tidspunkt, fortel Welsh. Den første delen, som har restar av bladet, vart funne i 2008. Den andre delen kom arkeologane over i fjor, ikkje så langt unna den første delen.

–Vi har ikkje store forhåpningar om å finne resten av knivbladet på sverdet, sidan dette var laga av jern og mest sannsynleg har forvitra etter snart 300 år i sjøen, fortel Welsh.

Dukka opp etter 273 år

Skipet til kaptein Svartskjegg, Queen Annes' Revenge, gjekk på grunn utanfor Beufort i North Carolina i 1718, og kaptein Svartskjegg sjølv ende livet sitt berre eit halvt år etter dette då han vart tatt til dage på oppdrag av guvernøren i Virginia.

• Les meir om kaptein Svarskjegg og hans endelykt på forskning.no

278 år etter at skipet gjekk ned, i 1996, oppdaga marinarkeologar vraket av det som mest sannsynleg er Queen Annes' Revenge utanfor kysten av North Carolina.

Sidan 1997 har arkeologar ved Queen Annes' Revenge skipsvrakprosjekt ved North Carolina Department of Cultural Resources grave fram titusenar av ulike gjenstandar frå vraket, noko som har gitt arkeologane ei unik innsikt i korleis sjørøvarane levde.

Blant artefaktane som er funne er blant anna ulike våpen og navigasjonsinstrument, men også medisinske instrument som til dømes ei urinrøyrssprøyte for injeksjon av kvikksølv mot kjønnssjukdommar.

Det er også funne restar av mat, som til dømes kjøt av storfe, svin og fugl, i tillegg til personlege eigedelar.

• Sjå nokre av gjenstandane som er funne på heimesidene til QAR skipsvrakprosjekt

Dekka av mudder

Vraket ligg på 7 meters djup og er nesten heilt nedgreve i havbotnen, slik at dei aller fleste gjenstandane må gravast fram frå mudderet.

Når gjenstandane blir avdekka er det umogleg å sjå kva dei er, då dei ved ein naturleg prosess har blitt dekt av eit lag med fast masse som består av korrosjonsprodukt saman med sand og skjel som har vore i omgivnadene.

Denne forsteininga vernar gjenstandane mot vidare nedbryting, og slik hjelper naturen arkeologane med å bevare

Skipsklokke

Arkeologane ved North Carolina Cultural department er omtrent halvferdige med jobben, men håpar å få nok støtte til å ta opp alle gjenstandane som ligg ved vraket. Målet er å få opp alt i løpet av 2014.

Det er overveldande å dykke ned og grave fram gjenstandar som har ligge på havbotnen i nesten 300 år, fortel Welsh.

Det ho har aller mest lyst til å finne blant vrakrestane som ligg att på havbotnen, er det endelege beviset på at dette er Queen Annes’ Revenge.

Welsh er spesielt interessert i å finne skipsklokka, som alltid ber namnet på skipet.

Sjølv om arkeologane er 99,9% sikre på at skipet er kaptein Svartskjeggs skip, har dei enno ikkje funne den rykande pistolen, beviset som kan avfeie all tvil.

I tilfelle vil namnet som står på skipsklokka vere Concorde, for dette var det opphavlege namnet på det franske slaveskipet som vart røva av Svartskjeggs piratar utanfor Martinique i 1717.

• Sjå video der sverdet og dei siste funna frå vrakstaden blir vist fram ved sjøfartsmuseet i Beaufort i North Carolina: