Steinknuseverk velta – skulle til omstridd vindkraftanlegg

– E39 blir heilt stengt frå onsdag kveld klokka 23 til torsdag morgon klokka 05, opplyser Statens vegvesen.

I tillegg til køane i Førde-området, blei det meldt om mykje trafikk på omkøyringsvegane i Sogn og Fjordane.

No syner det seg at transporten med eit steinknuseverk var på veg til Haramsøya i Møre og Romsdal.

Der skulle steinknuseverket brukast i samband med den svært omstridde vindkraftutbygginga.

Olav Sylte i firmaet Stangeland, som utfører transporten, seier til Sunnmørsposten at dei førebels ikkje veit årsaka til hendinga.

Velten skjedde rett før rushtida i bygdebyen Førde.

– Vi fekk inn ei melding frå politiet om lag 14.20 at ein spesialtransport med ein steinknusar hadde velta på veg ned Halbrendslia i Førde, opplyser vegoperatør Ketil Molvær til NRK.

E39 er hovudvegen mellom Bergen og Ålesund og det er fleire krappe og bratte svingar ned mot Førde sentrum.

Vogntoget velta i ein av dei siste svingane før ein kjem ned frå fjellet.

– Dette er ein brei og tung transport. Det er ein viktig veg, så eg vil jo tru at dei vil starte med dirigering så raskt som råd her.

Det er ikkje meldt om personskade.