Til saman var det rundt 230 kyr, oksar og kalvar i fjøset då det byrja å brenne.
Naudetatane fekk melding om brannen klokka 20.28 fredag kveld. Brannmannskapa hadde kontroll over brannen ved 22-tida, men ettersløkkinga gjekk framleis føre seg natt til laurdag.
– Rundt 50 dyr vart redda ut og er førebels fordelt på andre gardar i nærleiken. Nokon er også avliva, fortel operasjonsleiar Tom Johannessen i Vest politidistrikt til NTB.
Brannvesenet er framleis på staden i 09.30-tida laurdag morgon.
– Det er framleis ein del som ulmar og brenn smått i branntomta som vi ikkje klarer å sløkke, fortel innsatsleiar for brannvesenet, Runar Kleppe til NRK.
Bygningen kollapsa under brannen fredag kveld og det er mykje nedfall på staden.
– Vi ser ikkje det som trygt å gå inn og få tatt alle flammane. Vi må berre kontrollere det slik som det er, seier Kleppe.
Starta i fjøsen
Operasjonsleiar Johannessen fortel at politiet forlét staden ved 1-tida natt til laurdag, men at dei vil dra til brannstaden laurdag for å gjennomføre undersøkingar, avhøyr og samtalar med dei involverte.
Han seier det er inga openberr brannårsak, men det er på det reine at brannen har starta inne i fjøset.
– Vi skal undersøkje om brannen har starta i nokre maskiner, men det er altfor tidleg å seie noko om brannårsaka.
– Ufatteleg fortvilande
Ordførar i Gloppen, Leidulf Gloppestad, møtte opp ved brannen for å støtte eigarane av garden.
– Dette er ein forferdeleg situasjon for alle. Brann er noko av det verste ein kan ha uansett kva som brenn.
Han trur det må vere ufatteleg fortvilande for eigarane når ein veit kor mange dyr som er involverte.
– No er eg mest oppteken av å snakke med dei som står nærme dette og få følgt dei opp.
Sende ut store styrkar
Brannen starta i fjøsen på garden og spreidde seg til eit anna driftsbygg.
– Vi sende ut brannvesenet. Større einingar med mykje slagkraft. Vi har hatt første eining fremme som kan bekrefte at det er brann i fjøset. Det er også observert opne flammar over tak, seier Shahrooz Lahooti ved 110-sentralen til NRK klokka 20.48 fredag kveld
Det var eigaren av fjøsen som melde inn brannen til naudetatane.