Berga av brannmann: Leita etter sprengstoff frå 2. verdskrigen då vegbana rasa ut

Ei gravemaskin rasa i ettermiddag utfor ein bratt skrent etter at vegbana Stalheimskleiva i Vestland gav etter. Føraren blei berga ut på heltemodig vis av ein brannmann som fira seg ned i tau.

Stalheimskleiva ligg i Nærøydalen mellom Voss og Gudvangen og er eit svært populært turmål for bilturistar. Turistvegen har vore stengd i heile sommar på grunn av rasfare.

– Ulukka skuldast at vegbana gav etter. Vi sende ned ein mann i tau ned skråninga, som fekk redda sjåføren ut, seier brannsjef i Aurland, Reinhard Sørensen, til NRK.

Leita etter sprengstoff

Fleire spesialtrena hundar, hundeførarar og føraren av gravemaskina var på staden då vegen utan forvarsel forsvann.

– Ein del av mandatet med å ruste opp vegen inkluderer det å undersøke om det låg igjen eksplosivar frå krigens dagar. Det var difor hundar med nase for slikt på plass. Heldigvis har ingen av dei kome til skade, seier Brynjulv Eide i Statens vegvesen til NRK.

Det blei slått full alarm då meldinga kom. Alarmsentralen i Sogn og Fjordane opplyser at det blei sendt ut redningsfolk frå både Aurland og Voss.

Rasfarleg område

Føraren av gravemaskina framstod som uskadd då han blei henta ut, men blei sendt til lege for ein grundigare sjekk.

I mai blei fleire teltturistar nær tekne av steinras då dei villcampa rett ved vegen.

– Eg forklarte at det var rasfare, men det beit turistane ikkje på, sa Roald Jordalen til NRK den gongen.

Stalheim-området blei brukt som ein strategisk viktig base for tyskarane under 2. verdskrigen og det finst mange spor etter deira aktivitet. Blant anna bunkersar og skytestillingar.