Hopp til innhold

Denne butikkløysinga vil snart møte deg fleire stader i landet

Du opnar døra med bankkortet og viser legitimasjon med fingeravtrykk om du skal kjøpe øl.

For å komme inn i butikken må du trekkje kortet.

KORT: For å komme inn i butikken må du trekkje kortet.

Foto: Privat

Hegna Landhandel ligg tett på grensa mellom Midt-Telemark og Seljord kommune. Dei var først ut med den 100 prosent sjølvbetente løysinga då dei lanserte konseptet sommaren 2018.

Etter nesten to år med testing, blir det opna snart fleire sjølvbetente, døgnopne butikkar fleire stader.

Ifølgje menneska bak konseptet er det nemleg eit stadig større behov for sjølvbetent daglegvarehandel til alle døgnets tider i Noreg. Ikkje minst på bygda.

Fort gjort

Kunde Torkel Slaatun blei nysgjerrig på kva dette kunne vere for noko då han køyrde forbi Hegna Landhandel. Han lét seg imponere av butikkløysinga.

Torkel Slaatun lot seg imponere av den selvbetjente butikken da han prøvde den for første gang denne uka.

Torkel Slaatun lét seg imponere av den sjølvbetente butikken då han prøvde han for første gong denne veka.

Foto: Bo Lilledal Andersen / NRK

– Eg blei overraska. Eg trudde det berre var ein liten låve med nokre varer, men dette her var veldig bra. Artig, synest han.

Konseptet er enkelt. Kundane kjem seg inn ved å trekkje kortet. Dei plukkar varer, og betaler for seg ved å skanne vara på veg ut.

Det heile blir nøye overvaka, så butikktjuveri eller sal av alkohol til mindreårige har ikkje vore noko problem. For å få tilgang til alkohol innanfor opningstidene til ølsalet, må du nemleg legitimere deg eller bruke avtrykk frå tommelen.

Dei tilsette får i tillegg beskjed når kundar nærmar seg ølskapet.

Skal utviklast vidare

Landhandelen i Seljord kommune var den første i sitt slag her til lands. No skal åtte butikkar i utkantstrøk altså teste denne måten å drive daglegvarehandel på gjennom eit pilotprosjekt med statsstøtte.

Hans Olav Bakås, som eig og driv landhandelen, meiner dette kan bety veldig mykje for distrikta.

– Vi trur det kan senke kostnadene ved å drive ein butikk, samtidig som dei kan utvide opningstidene ganske mykje, seier han.

Skal butikkar på mindre stader overleve, må dei vere opne når folk vil handle, meiner Bakås.

20 prosent av daglegvarehandelen skjer nemleg mellom klokka 20 på kvelden og 08 om morgonen, ifølge Merkur, som har teke initiativ til pilotprosjektet. Merkur er eit statleg program i regi av Kommunal- og moderniseringsdepartementet.

Hegna Landhandel

TIDLEG UTE: Hegna Landhandel var den første i sitt slag med døgnopen, sjølvbetent butikk.

Foto: Bo Lilledal Andersen / NRK

Dagleg leiar, Gro Cathrine Aasgrav, legg til at det òg gir dei tilsette tid til å handtere andre oppgåver.

– Vi treng ikkje passe kassa, fordi vi veit at kundane greier seg sjølv, seier ho.

Åtte pilotbutikkar

I tillegg til Merkur, er Norgesgruppen, Coop og Snarkjøp også med på laget.

Selvbetjent kasse

Den betente kassa er erstatta med heilautomatisk betaling.

Foto: Bo Lilledal Andersen / NRK

Først ute var Eksingedalen i Vaksdal på Vestlandet. Lyngdal får også snart sjølvbetent butikk.

Etter planen skal det òg dukke opp fleire butikkar i Viken, Innlandet, Vestlandet og på Nord-Vestlandet dei kommande månadene.

– Vi synest det er spesielt artig at denne teknologien først blir testa ut i utkantstrøk, siger Hallvard Christenson, konsulent i Merkur.

Dei har òg har arrangert folkemøte for å informere lokalbefolkninga om butikktilbodet.

– Dette er det stor interesse for, seier han.