- Bensinen er alt helt på bålet

No vil Storbritannia sette inn ekstra ressursar for å stoppe grensekryssinga, melder immigrasjonsministeren i Storbritannia, James Brokenshire til BBC.

Han legg til at dei vil samarbeide tett med fransk politi, som sender forsterkingar til Calais. På den franske sida kjenner dei seg derimot åleine, og meiner britane må ta meir ansvar.

Tysdag var det streik blant franske ferjearbeidarar på grensa, og tunnelen over kanalen var stengd etter at dei streikande sperra toglinjene og sette fyr på bildekk. All trafikk, inkludert Eurostar-toget som går mellom London og Paris, var innstilt heile dagen.

Hundrevis av migrantar prøvde å kome seg om bord i dei stilleståande trailerane.

• Les: Kastet ut av Norge som 15-åring – prøver å komme seg til Dover som blindpassasjer

På vent i Calais

Calais er ein hamneby nord i Frankrike. Avstanden til Dover i England er berre 3 mil. Rundt 3000 migrantar oppheld seg i ein teltleir i området, som på folkemunne vert kalla «jungelen», medan dei ventar på å kome seg vidare.

Eit dagsenter der dei kan få ta seg ein dusj og eit varmt måltid har vorte opna. Dei har likevel ingen stad å sove, og må nøye seg med telt eller sove ute under open himmel.

– Ein burde sett inn humanitære telt. Då eg spurte innanriksministeren, sa han at ein ikkje må helle bensin på bålet. Men bensinen er allereie helt på bålet. Migrantane er her, seier borgarmeister Natacha Bouchart til France Info.

Bouchart seier at ho balanserer mellom humanitær bistand og å sikre tryggleiken i området. Ho kritiserer Storbritannia for å ikkje bidra, og seier at dei «ikkje har gitt ein einaste penny» til situasjonen.

– Dette må ein løyse på EU-nivå

Keith Vaz, Labour-talsmann for innanrikskomiteen i det britiske parlamentet, seier at å ta tak i problemet i Calais er for seint – dette må ein løyse på EU-nivå.

Ein har i det siste sett fleire slike grensekonfliktar mellom to land over flyktningar, t.d. mellom Italia og Frankrike om flyktningane som no oppheld seg i grensebyen Ventimiglia. Ungarn skapte kraftige reaksjonar med sine planar om å sette opp eit gjerde langs si grense mot Serbia, og har uttala at dei ikkje vil følge Dublin-avtala, som gjer at asylsøkarar kan sendast tilbake til det første landet i Europa der dei søkte asyl.

• Les: Et fire meter høyt gjerde skal stenge sånne som henne ute av Ungarn

Flyktningar har stått høgt på agendaen i EU i lang tid, med eit aukande tal redningsaksjonar i Middelhavet. Måndag annonserte EU at dei vil sette i gang ein aksjon langs kysten av Libya for å kjempe mot menneskesmuglarar og hindre båtar i å legge ut på havet.

• Les: Norsk skip reddet 600 flyktninger i Middelhavet