Forhandlingsmøtet i Genève er det første etter den store klimakonferansen i Lima i desember i fjor. Målet med forhandlingane denne veka har vore å utforme eit utkast til Paris-avtale. På klimatoppmøtet i Paris er målet at alle land skal samle seg om ein global avtale om å redusere utsleppa av klimagassar for unngå at temperaturen på jorda stig med meir enn to grader samanlikna med førindustriell tid. Avtalen skal gjelde frå 2020.
- Sjå også:
Fredag ettermiddag var eit 86 sider langt dokument klart. Nesten 200 land har delteke i forhandlingane.
– Grunnlaget er lagt
– Vi har nådd det som var målet for dette møtet, sa FNs klimasjef, Christiana Figueres etter at møtet var over.
– Vi har ein tekst, ein formell forhandlingstekst som blir grunnlaget for forhandlingane dei neste månadene, fram til Paris-møtet, sa Figueres.
Mange ulike interesser skal sameinast i avtaledokumentet. Ikkje minst har rike og fattige land motstridande syn i mange spørsmål. Dokumentet som no er klart, inneheld ei lang rekkje forslag, og tek opp i seg posisjonane som dei ulike landa har.
– Ikkje gjennombrot
LANG VEG TIL PARIS: Mykje arbeid står att om vi skal få ein god avtale i Paris, seier klima- og miljøminister Tine Sundtoft.
Foto: Eivind Molde / NRKDet er stort sprik mellom fleire av forslaga i dokumentet. Mens nokre land har utsleppsmål for 2050, opererer andre med omgrep som "så snart som mogeleg".
– Det er gledeleg at partane no har samla seg om eit felles forhandlingsgrunnlag. Det har likevel ikkje skjedd noko gjennombrot i spørsmålet om kva den nye klimaavtalen skal innehalde, og vi må no setje alle krefter inn på å komme til fram til semje i løpet av året, seier klima- og miljøminister Tine Sundtoft (H).
Byggje tillit
MÅ LYTTE TIL ALLE: Det er viktig med ein open og inkluderande prosess fram til Paris-møtet i desember, seier rådgjevar Johanne Sæther Houge i Naturvernforbundet.
Foto: Naturvernforbundet– Det var eit godt møte som var med på å byggje tillit mellom landa. Alle landa som var til stades fekk komme med sine innspel til den nye avtalen, seier Johanne Sæther Houge til NRK. Houge er rådgjevar i internasjonal klimapolitikk i Naturvernforbundet og Regnskogsfondet, og var til stades på møtet i Genève.
– At element som har mangla no er lagde inn i teksten, er ein prestasjon. Men vi har vanskelege forhandlingar framfor oss. Vi skulle gjerne sett meir framdrift her, for tida er i ferd med å renne ut, seier Elina Bardram, som leier EUs delegasjon til FN-forhandlingane.
