– Barn brent til døde av israelske busettarar

Jødiske ekstremistar er mistenkte for å stå bak. På åstaden skal det ha vore skrive graffiti på hebraisk. Ei davidstjerne og teksten «hemn» er blant det som skal ha blitt tagga.

Fire personar er sende til sjukehus

Hendinga fann stad i landsbyen Kfar Duma, nær Nablus, nord på Vestbreidda.

Ifølgje ein representant for dei palestinske styresmaktene på den nordlege Vestbreidda, så skal fleire busettarar ha kasta brannbomber inn i huset kor barnet og familien bur. Dei skal ha ropt «lenge leve Messias», før dei sprang frå staden, skriv Haaretz.

• LES OGSÅ: Israelske bosettere raser mot riveplaner

Barnets foreldre, dens fire år gamle bror og ei kvinne som var på besøk kom frå hendinga i live, men er sende til sjukehus.

Hendinga vert stadfesta av israelske tryggingsstyrkar, og området vert sjekka nøye for å finne dei som står bak ugjerninga.

Israel fordømmer handlinga

Augevitne fortel at faren ikkje klarte å redde barnet frå brannen på grunn av manglande elektrisitet og lys. Han klarte derimot å redde fireåringen og kona.

Fleire vitne fortel om hendinga, og seier at det var busettarar som først knuste vindauge, deretter kasta brannbomber og til slutt sprang frå staden i retning ei busetning i nærleiken.

Eit anna hus skal også ha blitt angripe. Motivet for ugjerninga er ikkje kjent.

– Brannen og drapet på det palestinske barnet er ei terrorhandling, seier Israels forsvarsminister i eit utsegn.

Han legg til at Israel ikkje tillèt terroristar å utføre slike angrep i Israel.

Ein talsmann for den israelske hæren, Peter Lerner, skriv på sin Twitter-profil at angrepet er ei barbarisk terrorhandling, og opplyser om at dei skadde er frakta til sjukehus i Israel.

Også ein talsmann for israelsk politi fordømmer ifølgje BBC handlinga, og seier at angrepet er utført av personar med nasjonalistiske motiv.

Den palestinske frigjeringsrørsla PLO seier derimot at dei held israelske styresmakter ansvarlege for drapet.

– Dette er ein direkte konsekvens av tiår med straffefridom for busettarterrorisme som er gitt av den israelske regjeringa, skriv PLO i eit utsegn som nyheitsbyrået AFP siterer.

Betent bustadpolitikk

Bustadpolitikken på Vestbreidda er eit stadig tilbakevendande konflikttema. Israel har oppretta fleire busetnader i området, og mange av busetnadane vert sett på som okkupasjon av palestinsk territorium.

Seinast denne veka vedtok regjeringa i Israel å opprette 300 nye bustader på det okkuperte Vestbreidda. Det vert også planlagt å bygge 504 bustader i tillegg, opplyser statsminister Benjamin Netanyahu sitt kontor i ei pressemelding.

Dette er nyheiter som vert kritisert av både FN og Noreg.

– Slike handlingar kan ikkje sameinast med Israels erklærte støtte til tostatsløysinga og sår nok ei gong tvil om Netanyahu-regjeringa forpliktar seg til fredsprosessen, seier utanriksminister Børge Brende i ei pressemelding om dei nye bustadane.