Regjeringa i Romania går av

– Eg ser den legitime sorga og raseriet som eksisterer i samfunnet. Dette må ikkje utarte til eit politisk spel med uforutsigbare konsekvensar.

Det sa den rumenske statsministeren Victor Ponta i dag da han trakk seg og kunngjorde at regjeringa går av.

Det blir truleg kunngjort ein ny statsminister i ettermiddag når Ponta har levert sin avskjedssøknad.

Regjeringskoalisjonen bestod av sosialdemokratane til Ponta, og ei rekke småparti.

Opposisjonen krever tidlig valg

Det største opposisjonspartiet krev at valet på ny nasjonalforsamling blir framskunda. Alina Gorghiu, ein av leiarane i det liberale partiet (PNL), seier ho ynskjer nyval for å løyse den politiske krisa i landet.

– Vi ynskjer ei ny nasjonalforsamling med legitimitet i folket, sa Gorghiu i dag.

Ein pressa statsminister

• LES: Korrupsjon har skulda for brannen

Statsminister Victor Ponta har vore under hardt press etter at det tidlegare i år vart klart at han blir tiltalt for korrupsjon og må møte i retten.

President Klaus Iohannis har bedt han om å gå av, men Ponta har i staden angripe korrupsjonsjegarane og kalla dei useriøse.

Spontanprotest i går

I går samla det seg over 25.000 menneske utanfor kontoret til statsministeren, med krav om at han går av.

– Folkemengden ropte «mordar», og skulda regjeringa for å vere ansvarlege for den tragiske nattklubbrannen der 32 personar omkom.

• LES: Raseriet veks mot regjeringa

Tala på omkomne stig nesten dagleg fordi det ligg mange hardt skadde på sjukehus som legane ikkje klarer å berge.

Symbolet på korrupsjon

Ponta blir av mange sett på som symbolen for korrupsjonen i Romania. Korrupsjon og kameraderi som la grunnlaget for tragedien.

Han vart i september tiltalt for bedrageri, pengevasking og skattesvik.

• LES: Fekk 17 millionar kroner levert i ein plastpose

Nattklubben stod i full fyr på mindre enn eit minutt

Klubben hadde brote brannforskriftene, noko som ikkje er uvanleg i hovudstaden, fordi det er lett å kjøpe seg løyver.

Brannen starta då pyro-showet til musikarane førte til brann i takplater. Kjellerlokalet vart i følgje politiet overtent på mindre enn eit minutt.

Mange nattklubbar har i ettertid valt å stenge på eige initiativ. Politiet har også stengt mange nattklubbar.

Store demonstrasjonar under presidentvalet i fjor

• SJÅ URIX: Politisk jordskjelv i Romania

Victor Ponta gjorde seg svært upopulær hjå delar av befolkninga under presidentvalet i fjor. Gjennom sosiale medium vart det avslørt at sosialdemokratane brukte ufine måtar for å samle støtte for kandidaturet til statsminister Ponta.

Mange rumenarar var også frustrerte fordi dei ikkje fekk anledning til å stemme i utlandet. Truleg bur det og arbeider over 3 millionar rumenarar i utlandet.

Ponta har brei støtte i store deler av befolkninga, men han er samtidig det mest mislikte politikaren i landet.