Den burmesiske Nobelprisvinnaren (1991) og menneskerettsaktivisten Aung San Suu Kyi vart nyleg sleppt fri frå ein sju år lang husarrest i heimlandet.
Ein av dei første plassane ho besøkte etter å ha fått tilbake fridomen sin, var ein AIDS-klinikk i utkanten av den burmesiske hovudstaden Yangon. Ifølgje direktøren for klinikken, Yazar, møtte fleire tusen menneske opp utanfor for å hylla den folkekjære aktivisten.
Same dagen som Suu Kyi avla sin visitt, skal lokale tenestemenn ha kome til klinikken og gjeve ordre om å avvikla verksemda innan ei veke, melder CNN.
- SJÅ OGSÅ: Eksklusivt NRK-intervju med Suu Kyi
– Skuldar på naboklagar
– Me har motteke slike trugsmål frå styresmaktene før, men denne gongen var åtvaringa mykje skarpare og svært alvorsprega, seier direktøren for klinikken som har om lag 80 AIDS-pasientar inne til behandling.
- LES OGSÅ:
Lokale styresmakter legg naboklagar til grunn for ordren, og seier det ikkje er føremålstenleg å driva eit slikt tiltak i eit travelt bustadområde.
Då Yazar bad om å få sjå klagebreva, blei han nekta dette.
– Me er uroa, fordi styresmaktene har gjeve oss frist fram til den 25. november på å flytta ut av lokala våre, seier direktøren til CNN.
Pasientane nekta opphaldsløyve
Burmesiske borgarar må søkja om løyve til å busetja seg utanfor området der dei vart fødde. Lokale styresmakter har no gjeve avslag på dei 80 pasientane sine søknader om opphaldsløyve i Dangon, der klinikken held til.
Ordren om å stengja ned behandlingssenteret kjem frå øverste hald i militærjuntaen som styrer landet, seier Yazar til CNN.
- LES OGSÅ:
Fredag kom tenestemenn frå helsedepartementet til klinikken for å informera om at verksemda må avviklast, og pasientane må overførast til eit statleg styrt AIDS-senter, ifølgje direktøren.
Den private AIDS-klinikken opna i 2002 og har haldt til i dei same lokala dei fem siste åra.
Det burmesiske helsedepartementet har ikkje svart på CNN sine førespurnader om å få ein kommentar i saka.