Det er opprørsstyrkar i delstaten Jonglei som trugar med å skyte ned helikopter som flyg over deler av regionen. Trugselen har kome inn via FN avdeling for tryggleik i Sør-Sudan, og vert sett på som ein alvorleg trugsel som trugar hjelpearbeidet i landet.
Mange helikopter skotne ned
– Det vil vere dramatisk om den livsviktige humanitære innsatsen i dei mest sårbare områda i Sør-Sudan vert hindra, eller i verste fall stansa, på grunn av dette, seier generalsekretær i Kirkens Nødhjelp, Anne-Marie Helland, som for tida er på reise i Sør-Sudan.
Seinast i august i fjor vart eit FN-helikopter skutt ned i Sør-Sudan. Då døde tre russiske FN-soldatar, og ein fjerde vart skadd, etter at helikopteret vart skote ned over byen Bentiu.
- LES OGSÅ:
Det har vore mange tilfelle av skyting mot helikopter i Sør-Sudan dei siste åra. Eit helikopter frå Verdas Matvareprogram skal ha blitt skote ned i Sør-Kordofan i januar i år. I desember 2013 vart to helikopter skotne to dagar på rad, og i desember 2012 vart eit FN-helikopter skutt ned i Sør-Sudan. Alle dei fem om bord i FN-helikopteret døde.
Kirkens Nødhjelp ikkje direkte truga
Etter dei nye trugslane har FN åtvara alle naudhjelpsorganisasjonar som opererer i Sør-Sudan om å vurdere om det er naudsynt å fly med helikopter for å få fram utstyr og materiell.
- LES OGSÅ:
– Vårt arbeid vil ikkje bli direkte råka av ein stans i flytrafikken i dette området, for me frakter utstyret vårt og materiell inn via landevegen. Men trugslane kan råke anna viktig humanitær innsats, seier Helland.
Stort humanitært behov
Om trugslane hindrar det humanitære arbeidet i Sør-Sudan kan følgene bli katastrofale i landet kor behovet er enormt for tida.
Kirkens Nødhjelp meiner at mellom 1 og 1,5 millionar menneske er på flukt i Sør-Sudan på grunn av krigen mellom president Salva Kiirs styrkar og tidlegare visepresident Riek Machar sine opprørsstyrkar. På grunn av tørketid er det for tida også stor mangel på mat og vatn.
– No er tida for å redde liv særs avgrensa. Det siste me som driv naudhjelpsarbeid i dette kriseråka landet treng, er å bli skyteskive for dei krigande partane, seier Helland.
- LES OGSÅ:
- LES OGSÅ: