– Russland kan forverre borgarkrigen i Syria

Forsvarsministeren trur at det kan vere fleire motiv for at Russland no går inn i borgarkrigen i Syria.

– Eitt motiv kan vere at dei vil skape seg ein posisjon i Midtausten, eller at dei vil ha merksemda vekk frå krigen i Ukraina. Det er vanskeleg å slå fast, seier Søreide til NRK.

• Les også: Nato fordømmer russisk kampfly-overtramp

– Ikkje støtt det syriske regimet

Ifølgje USA har mindre enn 10 prosent av angrepa frå Russland i Syria råka ekstremistane i IS, eller opprørarar med band til Al Qaida.

– Vår store uro er at dette vil eskalere konflikten på ein måte som gjer ei politisk løyring endå vanskelegare, fortel Søreide.

Russland held framleis fast ved at dei ikkje bombar moderate opprørsgrupper, men infrastrukturen i IS.

• Les også: Stoltenberg: Nato er bekymret over Putins støtte til Assad

Også generalsekretær i Nato, Jens Stoltenberg, snakka med pressa før han gjekk inn til møtet.

– Eg ber Russland ha ein konstruktiv og samarbeidande rolle i kampen mot IS, og ikkje støtte regimet til Bashar al-Assad. For å støtte regimet er ikkje eit konstruktivt bidrag til ei fredeleg løysing, seier han.

Syria blir tema på møte

Russland gjekk inn i borgarkrigen på lag med regimet i førre veke, og har gjennomført ei rekkje luftangrep mot opposisjonsstyrkar.

Forsvarsministrane i Nato møtast torsdag i Brussel, det er sett av ekstra tid til konflikten i Syria, som vert eit stort tema.

– Det er viktig å få dei ulike landa si vurdering av situasjonen. Alle landa har ei uro og interesse for å diskutere dette.