Begge partar i konflikten i Aust-Ukraina stadfester tysdag ettermiddag at det gjennom heile dagen har vore harde kampar inne i Debaltseve mellom regjeringsstyrkar og russiskvennlege opprørarar. Dette skjer trass i våpenkvila, som tok til å gjelde søndag.
Dei vedgår at våpenkvila er i ferd med å rakne.
Det ukrainske forsvarsdepartementet seier tysdag ettermiddag at opprørarane no kontrollerer Debaltseve. Separatistane melder at dei kontrollerer meir enn 80 prosent av byen.
– Opprørarane stormar stillingane våre, seier visepolitisjefen i Debaltseve, Ilija Kiva til nyheitsbyrået AFP.
Han legg til at det er fleire drepne og såra i byen, men at han førebels ikkje kan seie noko om kor mange det er snakk om.
Lokale separatistleiarar, som vil vere anonyme, seier til nyheitsbyrået Interfax at dei har drepe mange ukrainske soldatar.
NATO og EU uroa
NATO er uroa over at separatistane nektar å respektere våpenkvila, skriv NATOs øvstkommanderande i Europa, general Philip Breedlove i ei Twitter-melding.
EU ber partane i konflikten om å rette seg etter fredsavtalen, og følgje opp dei ulike punkta i samsvar med tidsplanen.
- Les også:
Natt til tysdag diskuterte den tyske forbundskanslaren Angela Merkel situasjonen med presidenten i Russland, Vladimir Putin. Også den ukrainske presidenten, Petro Porosjenko deltok i samtalen. Dei var samde om å be partane etterleve det som er avtalt.
Omringa ved Debaltseve
Det skal vere rundt 8.000 regjeringssoldatar ved Debaltseve, som er eit strategisk viktig jernbaneknutepunkt midt mellom Donetsk og Luhansk.
Separatistleiarane hevdar at dei har teke kontroll over jernbanestasjonen i byen, og at mange regjeringssoldatar har overgitt seg. Dette avviser derimot det ukrainske forsvaret.
- Les også:
Fleire ukrainske regjeringssoldatar er tekne til fange av opprørarane, ifølgje forsvarsdepartementet. Ein ukrainsk soldat sa tidlegare tysdag til nettavisa Ukrainska Pravda at dei i praksis er omringa av opprørarane.
Men ifølgje det russiske nyheitsbyrået Interfax har det i løpet av dagen vore forhandlingar mellom opprørarane og regjeringsstyrkane i Debaltseve-området. Det er første gong dette skjer.
Trekkjer tilbake tunge våpen
Heilt sidan våpenkvila blei innført, er det meldt om kampar i Debaltseve. Organisasjonen for tryggleik og samarbeid i Europa, OSSE, har tidlegare opplyst at opprørarar nektar dei å komme inn i byen. Førebels har dei oppretta ein base rundt 40 kilometer utanfor byen. Det blir arbeidd på spreng for å få observatørane inn.
Fredsplanen slår fast at partane skulle starte tilbaketrekking av tunge våpen ved midnatt tysdag lokal tid. Russiskvennlege opprørarar i Luhansk-regionen hevdar at dei no er i ferd med å oppfylle dette kravet. Det ukrainske forsvaret har ikkje kommentert saka.