- Profesjonelt overvakingsutstyr er hyllevare hos private selskap

Dette går fram av eit omfattande materiale som organisasjonen Privacy International har samla gjennom fleire år. Dette er snakk om liknande type utstyr som GCHQ (Government Communication Head Quarters) i Storbritannia og NSA (National Security Agency) i USA brukar, skriv den britiske avisa The Guardian .

Store messer

Private selskap frå land som Storbritannia, USA, Tyskland, Frankrike, Israel og Dubai marknadsfører varene sine på store messer i Dubai, Praha, Brasilia, Washington, Kuala Lumpur, Paris og London. Privacy International sine granskarar har brukt falsk identitet for å kome på innsida av desse selskapa.

I ein database, Surveillance Industry Index , har Privacy International samla detaljar om 338 selskap som tilbyr i alt 97 ulike teknologivariantar, som kan drive omfattande overvaking.

Eitt av selskapa marknadsfører seg med at utstyret deira kan greie å overvake opp til ein milliard samtalar per dag.

Kundane, som ofte er regjeringar i diktaturstatar i den tredje verda, blir presentert utstyr som gjer det mogleg å tappe Internett-trafikk og telefonsamtalar. Dei får også tilbod om meir James Bond-aktige duppedittar. Slik som kamera gøymde i colaboksar, kamera gøymde i mursteinar, barnesete eller våtserviettar.

Eitt selskap tilbyr å byggje om bilar til å bli mobile overvakingssentralar.

LES OGSÅ: – USA overvåket telefonen til 35 statsledere

LES OGSÅ: Stoltenberg: Tror ikke USA avlyttet meg

Ikkje ulovleg

Utstyret som blir tilbode er ikkje ulovleg, og selskapa sjølve seier at utstyret deira hjelper regjeringar i ulike land til å kjempe mot terror og kriminalitet.

Menneskerettsaktivistar kjøper ikkje denne argumentasjonen. Dei peikar på at diktaturstatar i Asia og Afrika kjøper dette utstyret for å overvakte nettopp dei som kjempar for menneskerettar. Libyas eksdiktator Muammar Gaddafi var kjend for å bruke hyllevare frå overvakingsbransjen i si overvaking av politiske motstandarar.

Matthew Rice i Privacy International meiner at selskapa som driv i denne bransjen tener pengar på at andre menneske har det vondt. Han reagerer på at selskapa ikkje er pålagde nokon form for restriksjonar.

LES OGSÅ: Spiegel: Merkel kan ha vært overvåket i ti år

LES OGSÅ: NSA: – Vi har ikke diskutert overvåkning av Merkel med Obama

– Treng strengare reglar

– Denne mangelen på restriksjonar gjer at selskapa kan selje varene sine til land som brukar overvakingsutstyret sitt til å spionere på menneskerettsaktivistar, journalistar og politiske motstandarar, seier han.

Rice meiner dei enkelte landa bør påleggje desse selskapa like strenge eksportreglar som til dømes våpenindustrien.

Fleire opposisjonspolitikarar i Storbritannia, blant dei Labours Ann McKechin, medlem av våpeneksport-komiteen i parlamentet, seier at ho er sterkt uroa over at avansert utstyr blir selt til regjeringar som ikkje burde ha fått det.

LES OGSÅ: Flere land skal stå bak USAs påståtte overvåkning av allierte

LES OGSÅ: Snowden har fått jobb i Russland

LES OGSÅ: Overvåket 478 e-poster om svensk Muhammed-karikatør